Зи къалэным хуэпэжщ Беслъэн

Дыгъэгъазэм и 27-м къэралым щагъэлъапIэ КъегъэлакIуэм и махуэр. Абы теухуа Iуэху гуапэхэр щрагъэкIуэкI Урысейм и МЧС-м и управленэу КъБР-м щыIэм, я лэ­жьакIуэхэр, ветеранхэр ягъэгушхуэу. 

ИпэжыпIэкIэ, къегъэлакIуэр IэщIагъэ къудейкъым, ар псэм щыщу, а лэжьыгъэ мытыншым укъыхуигъэ щIауэ щытын хуейщ. Апхуэдэ IэщIагъэм тегушхуэхэр ­гъащIэм ипсыхьа, лIыгъэ зыхэлъ, шынагъуэм ерыщу пэщIэувэф цIыхухэрщ. Зи гугъу фхуэтщIынур Урысей МЧС-м и Управленэу республикэм щыIэм и лэжьакIуэ пэрытхэм ящыщ, мафIэс-къегъэлакIуэ частым мафIэсыр гъэункIыфIыным хуэщIа и машинэхэр зегъэкIуэнымкIэ и инструктор нэхъыжь ШэджыхьэщIэ Беслъэнщ. 
Псынабэ къуажэм щыщ щIалэм 2001 гъэм Мэзкуу къыщиухащ гуманитар институтыр. Урысейм и МЧС-м и IэнатIэм 2009 гъэ лъандэрэ щолажьэ. 
Хъыбар къызэрыIэрыхьэу, ШэджыхьэщIэм плъыр къэ­рэгъулыр негъэс мафIэс къыщыхъуа щIыпIэм. Абы куэдкIэ елъытащ гупыр псынщIэу къызэщIэIэтэныр. Аращ ­жэуап зыхьыр мафIэсгъэункIыфIхэр щIыпIэм икIэщIыпIэ-кIэ нэгъэсынымкIэ, сыт и лъэныкъуэкIи лэжьыгъэр къы-зэгъэпэщынымкIэ. И IэщIагъэм зэрыхуэIэижьым и фIы­щIэкIэ ар зэрылажьэрэ зы аварие къигъэхъуакъым. Плъыр къэрэгъулым псынщIэу мафIэсхэм гулъытэ хуещI. ИпэжыпIэкIэ, абы и лэжьыгъэм къегъэув къа­рууфIэу щытыным и мызакъуэу, къызэрымыкIуэ щытыкIэхэм псынщIэу къызэрикIын Iэмалхэри къэгъуэтыфыныр. 
2022 гъэм ШэджыхьэщIэр Белгород областым ягъэ­кIуауэ щытащ. И лэжьэгъухэм ящIыгъуу ар мызэ-мытIэу хэтащ мафIэсхэр гъэункIыфIыным. 
- Бийм топышэхэр къиутIыпщынкIэ зэрыхъунум щхьэкIи къэдмыгъанэжу дэ дыкIуащ мафIэсхэр дгъэункIыфIын папщIэ, - игу къегъэкIыж Беслъэн. 
Абы лэжьыгъэм щызыIэригъэхьа ехъулIэныгъэ лъагэ- хэм унэсыфын папщIэ гугъуехьхэм ерыщу упэщIэтыфу, IэщIагъэм фIыуэ хэпщIыкIыу, гупым удекIуэкIыфу щытын хуейщ. ШэджыхьэщIэм фIыуэ хещIыкI мафIэсгъэункIыфI техникэм. Ар къыдэлажьэхэм къызэрацIыхур фIы и лъэ-ныкъуэкIэщ, жэуаплыныгъэ, хабзэрэ цIыхугъэрэ зыхэлъщи. 
ШэджыхьэщIэ Беслъэн унагъуэ дахэщ. И щхьэгъусэ ­Ренатэрэ абырэ зэдапI сабиищ: Имран, СулътIан, Ирианэ. И къуэхэм я мурадщ и адэм и лъагъуэм ирикIуэну. И бынхэм щапхъэ яхуэхъу Беслъэн гъащIэ узыншэм и телъхьэщ, зэман щиIэм футбол джэгуну фIэфIщ. 
Къыхэдгъэщынщи, и къалэнхэр хьэлэлу зэригъэзащIэм папщIэ абы дамыгъэ лъапIэхэр къыхуагъэфэщащ.
Ди гуапэщ дэтхэнэри фIыгъуэкIэ зыпэплъэ, къедгъэблагъэ илъэсыщIэм Беслъэн ехъулIэныгъэщIэхэр зыIэригъэхьэну, зыхуэпабгъэ и гурылъхэр къехъулIэну, и лэжьыгъэм гулъытэ лъагэ игъуэтыну.