Ди мыIэрысэр къэралым щызэбграш

Россельхознадзорым и управленэу Кавказ Ищхъэрэм щыIэм иджыблагъэ сэтей къищIащ Къэбэрдей-Балъкъэрым и мыIэрысэу 2024 гъэм Урысей Федерацэм и адрей щIыналъэхэм иращам и куэдагъыр. Республикэм ирашын ипэ къихуэу мыIэрысэ тонн мини 132,5-м я фIагъыр зыхуэдэр къапщытащ. Ар процент 17-кIэ нэхъыбэщ 2023 гъэм щыIа бжыгъэхэм нэхърэ.

Къэбэрдей-Балъкъэрым ираш мыIэрысэм и куэдагъым зэпымыууэ зэрыхэхъуэм къыдэкIуэу, ар зыIэрыхьэ щIыналъэхэм я бжыгъэри илъэс къэс нэхъыбэ мэхъу. Псалъэм папщIэ, 2023 гъэм ди пхъэщхьэмыщхьэр зыщэхуа щIыналъэхэр 36-рэ хъууэ щытамэ, илъэс блэкIам абы и бжыгъэр 49-м нэсащ. Апхуэдэу илъэсыщIэм ирихьэлIэу ди мыIэрысэхэр къыщыпхуэгъуэтыну щытащ Иркутск, Мурманск областхэм, Красноярск крайм, Донецк, Луганск республикэхэм, нэгъуэщI щIыналъэхэми я сату щIыпIэхэм.

ИщхьэкIэ зэрыщыжытIащи, КъБР-м и мыIэрысэхэр къотIасэ абыхэм ехьэлIауэ УФ-м щыIэ фитосанитар мардэхэм икIи абы щыхьэт тохъуэ Россельхознадзорым и IэщIагъэлIхэр.