КIэрыхур ягъэмащIэ

Электрокъару

«Урысей сетхэр - Кавказ Ищхъэрэ» - «Къэббалъкъэнерго» IуэхущIапIэм электрокъарууэ яфIэкIуэдым и куэдагъым процент 19,83-кIэ кIэригъэхуащ 2024 гъэм. Нэгъабэ абы и лъэныкъуэкIэ зыхуагъэувыжауэ щыта къалэнхэм нэхърэ процент 0,31-кIэ нэхъ мащIэщ ар, къитащ абы и пресс-IуэхущIапIэм. 
2023 гъэм щыIа бжыгъэхэм елъытауэ электрокъарууэ щIыналъэм щыкIуэдам и куэдагъыр процент 0,69-кIэ ягъэмэщIащ илъэс блэкIам. Ар наIуэ къыщыхъуащ а IуэхущIапIэм и унафэщI Зэгъэщтокъуэ Резуан иригъэкIуэкIа зэIущIэм. 
Абы нэмыщI, электрокъарур къэзыгъэсэбэп псоми хуащIэ Iуэхутхьэбзэхэм щIат пщIэм зы проценткIэ хухагъэхъуащ икIи абы къыпэкIуар сом меларди 8,2-м щIигъуащ.
ЦIыхухэмрэ IуэхущIапIэхэмрэ хуащIэ Iуэхутхьэбзэхэм хуэзэ ахъшэр нэхъыфIу къыхэзых щIыналъэхэм ящыщщ Дзэлыкъуэм, Майм, Прохладнэм, Шэрэджым щыIэ и къудамэхэр.
«Иджыпсту ди къалэн нэхъыщхьэу щытыр IуэхущIапIэхэм псэупIэ-коммунальнэ IуэхутхьэбзэхэмкIэ ятелъ щIыхуэр гъэмэщIэнырщ. Энергетикхэми коммунальнэ Iуэхутхьэбзэхэр цIыхухэм яхуэзыщIэхэри я лэжьыгъэр къызыхуэтыншэу ягъэзащIэми, куэдым къагъэсэбэпа уэздыгъэм и уасэр и чэзум пщIэр ятыркъым, щыIэ хабзэхэр къызэпауд. А ахъшэхэр игъуэу къытIэрыхьэу щытамэ, республикэм и электросеть комплексым нэхъри зедгъэужьыфынут, цIыхухэм яхуэдутIыпщ электрокъарум и лъэщагъми кIэрыхунутэкъым икIи зэпымыууэ яIэрыхьэнут», - жиIащ Зэгъэщтокъуэ Резуан.