ЦIыхухэм я тыншыпIэм хуэщIауэ

КъБР-м и Iэтащхьэ КIуэкIуэ Казбек иригъэкIуэкIащ Налшык, Бахъсэн, Прохладнэ къалэхэм дэт, фэтэр куэду зэхэт унэхэм зэгъэпэщыжыныгъэ­хэр щегъэкIуэкIыным, абыхэм я щы­тыкIэм кIэлъыплъыным, ­къегъэщIылIа щIыналъэхэр зэIузэпэщ щIыным теухуа зэIущIэ. 

Абы хэтащ КъБР-м и Правительствэм и УнафэщI Мусуков Алий, республикэм и Iэтащхьэм и администрацэм и УнафэщI ­Къуэдзокъуэ Му­хьэмэд, ухуэныгъэмрэ псэупIэ-коммунальнэ хозяйствэмкIэ министрым и ­къалэнхэр зыгъэзащIэ Журавлев ­Андрей, транспортымрэ гъуэгу хозяйствэмкIэ министр ДыщэкI Аслъэн, финансхэмкIэ министр Лисун Еленэ, щIы­уэпсым и хъу­гъуэфIыгъуэхэмрэ экологиемкIэ министр Шаваев Ильяс, тарифхэмрэ псэупIэм и IэнатIэм щыкIэлъыплъынымкIэ къэрал комитетым и унафэщIым и къалэнхэр зыгъэзащIэ Мэкъушэ Алим, Налшык къалэ администрацэм и унафэщI Ахъуэхъу Таймураз, Бахъсэн къалэ администрацэм и унафэщI Мамхэгъ ­Хьэчим, Прохладнэ къалэ администрацэм и унафэ­щIым и къа­лэнхэр зыгъэзащIэ Кожухов Кирилл, республикэм Фэтэр куэду зэхэт унэхэм я щIыналъэ операторым и унафэщI Кулиев Мустафир, ведомствэ, IэнатIэ щхьэ­­хуэхэм я лIыкIуэхэр.
КIуэкIуэ Казбек зэIущIэр къыщызэIуихым къыхигъэщащ щхьэу­сыгъуэ зэхуэмыдэхэм къы­хэкIыу фэтэр куэду зэхэт унэхэр тэмэму зыхуей щыхуа­мыгъазэ куэдрэ къызэрыхъур, абы ипкъ иткIи коммунальнэ IуэхутхьэбзэхэмкIэ гугъуехьхэр зэрыщыIэр, абыхэм унэхэм щыпсэухэм я мыарызыныгъэхэр къызэрыхэ­кIыр.
Республикэм и Iэтащхьэм администрацэхэм, а Iуэхур зэгъэ­щIылIа министерствэхэмрэ ведомствэхэмрэ пщэрылъ ящи­щIащ фэтэр куэду зэхэт унэхэм зэракIэлъыплъыр егъэфIэкIуэ­нымкIэ хэкIыпIэхэр къагъуэтыну, псэупIэм теухуауэ щыIэ унафэр зэрагъэзащIэм ткIийуэ кIэлъы­плъыну.
Апхуэдэу зэIущIэм щытепсэ­лъыхьащ республикэм и жылагъуэхэм я щытыкIэр зэIузэпэщ щIы­ным теухуа Iуэхухэми.
«ГъащIэм папщIэ инфра­струк­турэ» лъэпкъ проекты­щIэм ипкъ иткIэ, къалэ псэупIэр егъэфIэ­кIуэным хуэунэтIауэ ирагъэкIуэкI лэжьыгъэхэм къыпащэнущ. 2018 гъэм щегъэжьауэ республикэм щIыналъэ 863-рэ зэIузэпэщ щащIащ, абы ­щыщу 225-р жылагъуэ щIы­пIэщ, 638-р пщIантIэщ. Зэман гъунэгъум къриубыдэу иджыри жылагъуэ щIыналъэу 208-рэ зыхуей ­хуагъэзэну я мурадщ.
ЗэIущIэм и гугъу щащIащ ­муниципалитетхэм я лэжьа­кIуэ­хэм я улахуэр нэхъыбэ зэ­ращIынум, я IэщIагъэмкIэ яIэ зэфIэкIым зэрыхагъэхъуэнум.
- ПсэупIэ-коммунальнэ IэнатIэм и лэжьыгъэр зэрызэтеу­-блам и фIагъым куэдкIэ елъытащ цIыху­хэм я псэукIэр зы­хуэдэнур, ахэр я унэм къы­щыщIэкIкIэ яIэну гукъыдэжыр. Абы къы­хэкIыу ди къалэхэр тыншыпIэм хуэщIауэ, иджырей мардэхэм ­къитIасэу тщIын ­папщIэ, адэкIи нэхъ жыджэру дызэрылэжьэнум дыхущIэ­- ­къу­нущ, - жиIащ КIуэкIуэ Казбек.