ХуэунэтIащ щIэпхъаджагъэм и щхьэр къемыгъэIэтыным

Террорым пэщIэтынымкIэ комиссэм и зэIущIэ иригъэ­кIуэ­кIащ КъБР-м и Iэтащхьэ КIуэкIуэ Казбек. 

Къызэхуэсахэр тепсэлъыхьащ щIыналъэр шынагъуэншагъэ и лъэныкъуэкIэ зэрыт щытыкIэм. Абы и лэжьыгъэм хэтащ КъБР-м и Парламентым и УнафэщI Егоровэ Татьянэ, Правительствэм и УнафэщI Мусуков Алий, УФ-м и Президентым и полномочнэ лIыкIуэу КИФЩI-м щыIэм и аппаратым КъБР-м щиIэ къэрал инспектор нэхъыщхьэ Васильченкэ Дмитрий, Правительствэм хэтхэр, министрхэр, хабзэхъумэхэр, дзэм, щIыпIэ администрацэхэм я лэжьакIуэхэр. 
ЗэIущIэм кърихьэлIахэр едэIуащ транспортым и инфраструктурэр шынагъуэншагъэм зэрыхуэ­хьэзырым теухуа къэпсэлъэныгъэм. Ар нэхъри ­гъэбыдэным хуэунэтIа Iуэху щхьэхуэхэм я ­гугъу ящIащ.  Къи­нэмыщIауэ, мыхъумыщIагъэ ­зигу илъхэм яхуэ­мыбэлэрыгъыным хуэунэтIа лэ­жьыгъэхэми тепсэ­лъыхьащ. 
КIуэкIуэ Казбек къыхигъэщащ Путин Владимир терроризмэм лъэныкъуэ псомкIи пэщIэтыным хуэунэтIауэ 2024 - 2028 гъэхэм зэфIэгъэкIыпхъэ ­къалэнхэр къызэригъэувар. Абы лъабжьэ хуохъу хабзэ хъуауэ къекIуэкI щэнхабзэ-псэкупсэ лъапIэныгъэхэр хъумэн зэрыхуейр, терроризмэм къы­хуезыджэхэм цIыхухэр къахуэмыгъэпцIэн хуэдэу. План ягъэувам нэхъыщхьэу хэтщ гурыщхъуэ зы­хуащI цIыхухэм ядэлэжьэныр, терроризмэм и идеологием димы­хьэхыфын хуэдэу. 
ЗэIущIэм и кIэм комиссэм хэтхэм гу лъатащ щIыналъэр терроризмэм пэщIэтыфын папщIэ, ар зэрыт жылагъуэ-политикэ, цIыхубэ-экономикэ щытыкIэми мыхьэнэ зэриIэм. Къудамэ щхьэхуэхэр зэлъэIэсу зэдэлэжьэн хуэдэу, унафэ зыбжанэ къащтащ. А ­псори хуэунэтIащ щIэпхъаджагъэм и щхьэр къе­мыгъэ­Iэтыным, ар къэзыгъэхъу щхьэусыгъуэхэр гъэкIуэдыным. Мыпхуэдэ лэжьыгъэр дяпэкIи екIуэ­кIынущ.