Шэмрэ шатащхьэмрэ

Къэралым гъэшым елэжь и IуэхущIапIэхэм я 2-нэ Сыбыр зэхуэсу Горный Алтай республикэм и «Манжерок» курортым иджыблагъэ щекIуэкIам УФ-м мэкъумэш хозяйствэмкIэ и министр Лут Оксанэ щытепсэлъыхьащ 2024 гъэм яхузэфIэкIахэмрэ IэнатIэм къыпэщылъ къалэнхэмрэ.

УнафэщIым жиIащ къэралым къыщыщIаш гъэшым и куэдагъыр тонн мелуан 38,5-м нагъэсыну зэрамурадыр, абы къыдэкIуэу экспортым ягъакIуэми хагъэхъуэну зэрыфIэигъуэр. Псалъэм папщIэ, хамэ къэралхэм гъэшу иращэм и куэдагъыр нэгъабэ тонн мин 210-м нагъэсащ. Апхуэдэуи гъэшым елэжь IэнатIэхэм зэрыхудачых кредитхэр, къэрал дэIэпыкъуныгъэу, илъэс 15 пIалъэкIэ иратынущ, абыхэм я лэжьыгъэхэм зрагъэубгъун, Iэщ бжыгъэм къыхагъэхъуэн, техникэщIэхэмрэ обрудованэхэмрэ кърыращэхун папщIэ.

«Ерыскъы шынагъуэншагъэр иджырей технологиехэмкIэ къызэгъэпэщын» лъэпкъ пэхуэщIэщIэм къызэщIеубыдэ къэралым гъэшым елэжь и IэнатIэм и дэтхэнэ зы унэтIыныгъэри.

Къэбэрдей-Балъкъэрыр къэдгъэлъагъуэмэ, 2024 гъэм шэрэ шатащхьэу ди щIыналъэм къыщыщIагъэкIам и куэдагъым фIыуэ хэхъуащ. ЖыпIэнурамэ, Кавказ Ищхъэрэм СтатистикэмкIэ и управленэм къызэритамкIэ, шэуэ къашащ тонн мин 37-м нэблагъэ икIи ар процент 11-кIэ нэхъыбэщ 2023 гъэм елъытауэ. Шатащхьэу трахащ тонни 127-рэ, ари проценти 3,7-кIэ нэхъыбэщ абы ипэ ита илъэсым яхузэфIэкIам нэхърэ.

Мыдрейуэ, ди республикэм къыщалэжьа гъэшым и нэхъыбэр ди щIыналъэм къыщонэж, ауэ абы къыхащIыкIа кхъуейм, тхъуцIынэм, шатэм къэралым и адрей щIыналъэхэм я сату щIыпIэхэм уащрохьэлIэ.