Промышленность
Кавказ Ищхъэрэм СтатистикэмкIэ и управленэм къызэритамкIэ, 2025 гъэм и щIышылэм Къэбэрдей-Балъкъэрым и промышленнэ индексыр нэгъабэ и апхуэдэ пIалъэм ирихьэлIэу зэрыщыта бжыгъэхэм елъытауэ проценти 123,1-кIэ хэхъуащ.
Къапщытэж лъэхъэнэм къриубыдэу хэхъуэ нэхъыбэ къэзыгъэлъэгъуар продукцэхэр къыщIэзыгъэкI, абыхэм елэжь IэнатIэхэрщ (проценти 132,2-рэ). ПсыкIэ къызэзыгъэпэщхэм, къагъэсэбэпар Iузышхэм, кIэрыхубжьэрыхухэр зэщIэзыкъуэхэм, уэрамхэр, пщIантIэхэр зэлъыIузыххэм я индексхэм проценти 102,6-кIэ хагъэхъуащ.
Продукцэхэр къыщIэзыгъэкIхэм, абыхэм елэжь IэнатIэхэм ящыщу хэхъуэ нэхъыбэ зиIэр псыхэкI лIэужьыгъуэхэр къыщIэзыгъэкIхэрщ (процент 236,3-рэ); фэм, фэхэкIым хэтхэм (проценти 190,9-рэ), химие пкъыгъуэхэр, продукцэхэр къыщIэзыгъэкIхэм (проценти 161,3-рэ), нэгъуэщI хьэпшып, продукцэ хьэзырхэр къыщIэзыгъэкIхэм (проценти 177,1-рэ), машинэхэмрэ оборудованэхэмрэ зэзыгъэпэщыжхэмрэ ахэр зыгъэувхэмрэ (процент 203,4-рэ) яIэщ.
«Къэбэрдей-Балъкъэрым и промышленнэ индексыр щIыхэхъуэм щхьэусыгъуэ зыбжанэ иIэщ. Псалъэм папщIэ, IуэхущIапIэхэр зэрырагъэфIакIуэр, продукцэ лIэужьыгъуэхэм зэрыхагъахъуэр, нэгъуэщIхэри. Абы нэмыщI, федеральнэ корпорацэ инхэм ящыщ зымрэ «Росгеология»-мрэ зэгурыIуэныгъэхэр етщIылIащ республикэм и хьэрычэт IэнатIэ мащIэмрэ курытымрэ зегъэужьыным ехьэлIауэ, абы и фIыгъэкIи Къэбэрдей-Балъкъэрым фIагъ лъагэ зиIэ и продукцэхэр зыхуедгъашэ нэгъуэщI щIыналъэхэм я бжыгъэм къыхэхъуащ.
Промышленнэ производствэм и куэдагъым зэрыхэхъуэм къыдэкIуэу, ухуэныгъэу ящIри нэхъыбэ мэхъу. Псалъэм папщIэ, унащхьэм тралъхьэ къэнжалу къыщIагъэкIымрэ гъущIым къыхэщIыкIа хьэпшыпхэр, Iэмэпсымэхэр фIыуэ нэхъыбэ хъуащ. Автотранспортхэр къыщIэзыгъэкIхэм яхудиIэ зэгурыIуэныгъэхэм япкъ иткIэ абыхэм пкъралъхьэ пкъыгъуэхэр ди деж щащI.
Апхуэдэуи къэрал программэхэм дызэрыхэтым, щIэупщIэ зиIэ, экспортым бгъакIуэ хъун продукцэхэр къызэрыщIэдгъэкIым ифI къызэрыдэкIми шэч хэлъкъым. Мис абыхэм псоми зэгъусэу щIыналъэм и экономикэр ягъэбыдэ, инвестицэхэр къетшэлIэну Iэмалхэри къыдат», - жиIащ КъБР-м экономикэ зыужьыныгъэмкIэ и министр Рахаев Борис.
