Тэрч щIыналъэм япэу щIедзэ

Вэн-сэн лэжьыгъэхэр

Дызэрыт илъэсым Къэбэрдей-Балъкъэрым и мэкъумэшыщIэхэм хьэцэпэцэмрэ джэш хъуреймрэ гектар мин 213,4-рэ хухахынущ, нэгъабэ щыIа бжыгъэхэм нэхърэ проценти 3,6-кIэ нэхъыбэщ ар. Абы щыщу гектар мини 131,6-р нартыхум иратынущ, 2024 гъэм яхузэфIэкIам нэхърэ проценти 2,7-кIэ ари нэхъыбэщ, къитащ КъБР-м Мэкъумэш хозяйствэмкIэ и министерствэм. 
Республикэм и щIыналъэхэм ящыщу Тэрч районым и мэкъумэшыщIэхэм губгъуэ лэжьыгъэхэм япэу щыпэрыхьащ: щIыгъэпшэрхэр хьэсэм халъхьащ, гъатхасэри жыджэру ирагъэкIуэкI. Мы гъэм гектар мин 38-м нэблагъэ абы хухахынущ. 
Хуабэу яIа тхьэмахуитIым къриубыдэу гектари 120-м кIэртIофыр щыхащIащ районым, гектар 1300-м - гъатхасэ хьэр. ДызыхуэкIуэ махуэхэм джэш хъурейми щIадзэнущ.
Тэрч щIыналъэм бжьыхьэсэр зыщытращIэр гектар мини 10-м нэблагъэрщ. Мэкъумэш хозяйствэмкIэ щIыпIэ управленэм къызэритамкIэ, фитосанитар и лъэныкъуэкIэ жылапхъэхэр щыIэ мардэм къотIасэ, я щытыкIэхэми арэзы укъещI. 
Губгъуэ лэжьыгъэхэм къадэкIуэу, жылапхъэу, щIыгъэпшэру, ядохимикату, гъэсыныпхъэу зрикъунум хуэдиз мэкъумэшыщIэхэм кърашалIэ.
Фигу къэдгъэкIыжынщи, Къэбэрдей-Балъкъэрым жылапхъэу тонн мелуан 1,14-м щIигъу нэгъабэ къыщрахьэлIэжащ, абы щыщу гектар мин 881,7-р нартыхуу.