Балъкъэрхэм я гуфIэгъуэр зэдаIэт

КъБР-м и Музыкэ къэрал театрым концерт гукъинэж щекIуэкIащ балъкъэр лъэпкъым и къэ­щIэрэщIэжыныгъэм и махуэхэм и щIыхькIэ. 

ГуфIэгъуэ пшыхьым зыкърагъэхьэлIащ Къэбэрдей-Балъкъэрым щыпсэухэмрэ ди хьэщIэхэмрэ, щIыналъэм и уна­фэщIхэм ящыщхэм, жылагъуэ лэжьакIуэхэм, студентхэм, еджакIуэхэм. 
Къызэхуэсахэм фIэхъус гуапэ яриха нэужь, Къэбэрдей-Балъкъэрым и Правительствэм и УнафэщI Мусуков Алий къеджащ республикэм и Iэтащхьэ КIуэкIуэ Казбек щIыналъэм исхэм зэразыхуигъазэ хъуэхъум. 
Абы итт: «ПщIэ зыхуэсщI си лъахэгъухэ! Къэбэрдей-Балъкъэрым щыпсэухэ! Сигуми си псэми къабгъэдэкIыу сынывохъуэхъу къэблэгъа махуэщIымкIэ – Балъкъэр лъэпкъым и къэщIэрэщIэжыныгъэм и махуэмкIэ. 
Псоми ди зэхуэдэ, псори дызыщыгуфIыкI а махуэм къегъэлъагъуэ захуагъэр зэрытекIуэр, балъкъэр лъэпкъым хэлъ къарур, къэмылэнджагъэр, быдагъэр. Лей зытехьэу гугъуехь куэд зышэча а лъэпкъым

Абы къыкIэлъыкIуа илъэс пщIы бжыгъэхэр лъэпкъым и дежкIэ хъуащ социальнэ, экономикэ, щэнхабзэ зыу­жьыныгъэ лъагэм я лъэхъэнэ. Ноби балъкъэрхэр лъэ быдэкIэ хэтщ Къэбэрдей-Балъкъэрым щыпсэу лъэпкъ­хэм я унагъуэшхуэм, зэгурыIуэм икIи зэрыIыгъым. Ар ипэкIэ мэкIуатэ, къэкIуэнур дахэу еухуэ, ехъулIэныгъэхэр зыIэрегъэхьэ, и къаруи зэфIэкIи ирехьэлIэ ди респуб­ликэри къэралри гъэбыдэным. 

Си фIэщ мэхъу дызэкъуэтмэ, игъащIэ лъандэрэ къыддекIуэкI зэныбжьэгъугъэ быдэм, къуэшыгъэм, нэгъуэщI лъапIэныгъэхэм дахуэпэжмэ, гугъуехь псоми ды­зэ­ры­пэлъэщынур, ди республикэм, Хэкум я ехъулIэныгъэхэм хуэгъэзауэ зыхуэдгъэувыж мурадхэм дазэрылъэIэсынур. 
Си гуапэу сохъуэхъу Къэбэрдей-Балъкъэрым щыпсэу псоми мамырыгъэ, насып, зэпэщыныгъэ яIэну». 
Мусуков Алий республикэм и Iэтащхьэм и псалъэхэм дыщIигъуу, КъБР-м и Правительствэм, езым и щхьэм къыбгъэдэкIыу, балъкъэрхэм я мызакъуэу, щIыналъэм ис псоми я зэхуэдэ махуэшхуэмкIэ ехъуэхъуащ зэгурыIуэ яку дэлъыну, насып, ехъулIэныгъэ, гуапагъэ, мамырыгъэ яIэну.
Концертыр ягъэдэхащ республикэм и уэрэджыIа­кIуэ, къэфакIуэ цIэрыIуэхэмрэ Кавказ Ищхъэрэм и ­хэгъэгухэм къикIа хьэщIэ лъапIэхэмрэ. Республикэм и артистхэр ­къеджащ балъкъэрхэм я гъащIэм теухуа усэ куп­щIафIэхэм. 
Хэку зауэшхуэм ТекIуэныгъэ Иныр къызэрыщытхьрэ илъэс 80 зэрырикъум и щIыхькIэ, зауэ уэрэдхэм щыщи концертым щагъэзэщIащ. Щхьэхуэу къытеувыIащ тха­кIуэшхуэхэу Кулиев Къайсынрэ КIыщокъуэ Алимрэ яку дэлъа зэныбжьэгъугъэ быдэм, Хэку зауэшхуэм, гугъу­ехь куэдым ахэр зэгъусэу зэрыпхыкIам. Пшыхьыр зэхуащIыжащ «Си Къэбэрдей-Балъкъэр» уэрэдымрэ зэныб­жьэгъугъэм и къафэкIэ.
Музыкэ театрым и пэIущIэ пэшым щагъэлъагъуэ сурэтхэмрэ дэфтэрхэмрэ щызэхуэхьэса «Моя Балкария» выставкэмрэ декоративно-прикладной гъуазджэм и хьэпшып гъэщIэгъуэнхэмрэ. Балъкъэрхэм я къэ­щIэ­рэщIэжыныгъэм я махуэм иращIэкI зэхыхьэхэм респуб­ликэм мы махуэхэм иджыри щыпащэнущ выставкэхэмкIэ, зэIущIэхэмкIэ, концертхэмкIэ. 

Сурэтыр  Къарей  Элинэ  трихащ.