КъБР-м и Лъэпкъ музейм етIуанэу щызэхаублэ «Гардарика-Кавказ» арт-фестивалыр.
Зэрырагъажьэрэ илъэситху хъу мы Iуэхур ди щIыналъэм етIуанэу щокIуэкI. Зи хъэтI, зи дуней еплъыкIэрэ гупсысэкIэрэ зиIэж художникхэм я лэжьыгъэхэр щыболъагъу абы. Гур хэзыгъахъуэщ ди сурэтыщIхэу Ахъмэт Лиуан, Сарбашев Анзор, Црым Руслан сымэ я IэдакъэщIэкIхэр. Ленинград СурэтыщI гъуазджэмкIэ и школым и художникхэм, Петров-Водкин и гъэсэнхэу Прошкинхэ Викторрэ Анатолэрэ, Беловская Викторие сымэ я лэжьыгъэхэр. АдэкIэ къокIуэ Блинов Стас, Крафт Еленэ, узбек сурэтыщI Бахтеев Айвар, Никонов Сергей, Бесараб Юлие, Горнэ институтым и профессор, ятIэ гъэжьам елэжь Петров Викторрэ абы и гъэсэн Кравцовэ Мариерэ я сурэтхэр. Гъэлъэгъуэныгъэм хагъэхьащ хамэ къэралхэм щыщ художникхэм я IэдакъэщIэкIхэри. Сурэтхэр, графикэ, скульптурэ, художественнэ керамикэ жыпIэми, абы гъуазджэм и унэтIыныгъэ зэмылIэужьыгъуэхэр къызэщIрагъэубыдащ. Художникхэм я лэжьыгъэхэм щIагъужащ я сурэтрэ я творчествэм теухуа тхыгъэрэ.
Выставкэр къызэIуихащ КъБР-м ЩэнхабзэмкIэ и министерствэм профессиональнэ гъуазджэмрэ художественнэ егъэджэныгъэмкIэ и къудамэм и унафэщI, КъБР-м гъуазджэмкIэ щIыхь зиIэ и лэжьакIуэ ПащIэ Рамед. Абы къызэхуэсахэм фIэхъус гуапэ яриха нэужь, зи лIыкIуэ министерствэм и унафэщI Къумахуэ Мухьэдин Iуэхум хэтхэм зэрызахуигъазэ хъуэхъумрэ псалъэ гуапэхэмрэ яжриIащ.
- Гъэлъэгъуэныгъэм хагъэхьа лэжьыгъэхэр гъэщIэгъуэнщ икIи ахэр зи Iэдакъэ къыщIэкIа художникхэм я гъащIэмрэ гуащIэмрэ зыщыбгъэгъуэзэнымкIэ IэмалыфIщ, - жиIащ ПащIэ Рамед. - ХьэщIэхэм мы Iуэху дахэр къызэрызэрагъэпэщамкIэ фIыщIэ яхуэфащэщ. ЩIэщыгъуэ куэд щыплъагъу мы выставкэм цIыхушхуэ къекIуэлIэну ди гуапэщ!
КъБР-м и Парламентым щэнхабзэмкIэ, граждан жылагъуэм зегъэужьынымрэ хъыбарегъащIэ политикэмкIэ и комитетым и унафэщI Текуев Амырбий художникхэм я нэкIэ тхыдэр, дахагъэр къыщыгъэлъэгъуа лэжьыгъэхэм налшыкдэсхэр еплъыну Iэмал зэраIэмкIэ ехъуэхъуащ.
КъБР-м и цIыхубэ сурэтыщI Темыркъан Геннадий къыхигъэщащ художник Iэзэхэр ди къэралым, республикэм зэримымащIэр, сурэтыщI гъуазджэм гъунэ зэримыIэр, мы Iуэху щхьэпэм дяпэкIи къыпащэу зрагъэубгъуну зэрыщыгугъыр.
СурэтыщI гъуазджэмкIэ музейм, Ткаченкэ Андрей и цIэр зезыхьэм, и къудамэм и унафэщI Леонтьевэ Нинэ выставкэм зыкърезыгъэхьэлIахэр щигъэгъуэзащ Iуэхур къызэзыгъэпэщахэр зэрызригъэцIыхуамрэ Къэбэрдей-Балъкъэрым ахэр къызэрыригъэблэгъамрэ.
Выставкэр езыгъэкIуэкI Пинижаниновэ Еленэ Iуэхур зи жэрдэмхэм къабгъэдэкIыу КъБР-м и Лъэпкъ музейм и унафэщIымрэ и лэжьакIуэхэмрэ фIыщIэ яхуищIащ, фестивалыр къызэрагъэпэщыным теухуауэ илъэс етIуанэ хъуауэ къазэрыдэIэпыкъум папщIэ. Ар тепсэлъыхьащ «Гардарика» арт-фестивалым и тхыдэ дахэм. Абы къыхигъэщащ Санкт-Петербургрэ Къэбэрдей-Балъкъэрымрэ я зэпыщIэныгъэр жыжьэ къызэрыщежьэр, Ленинград блокадэм щыгъуэ а къалэм щеджэ ди художник куэд къадеджэхэм ядэIэпыкъуауэ зэрыщытар, иджыри а хабзэ дахэм, зэныбжьэгъугъэм мы IуэхумкIэ зэрыпащэр.
Зэхыхьэм и эксперт, искусствовед Кирилловэ Риммэ щхьэхуэу къытеувыIащ зи лэжьыгъэ ягъэлъагъуэ художникхэм. Абы жиIащ Iуэхур япэщIыкIэ я Эрмитажым и къудамэу Выборг къалэм щыIэм къызэрыщызэрагъэпэщар. Абы Урысейм и къалэ цIыкIухэм къыщыпащэну зэраубзыхуар, зи лэжьыгъэхэр щIыналъэ зэмылIэужьыгъуэхэм щызыгъэлъагъуэ художникхэм папщIэ.
Фестивалым хыхьэу лекцэхэр, зыплъыхьакIуэхэр, мастер-классхэр, пшыхь щIэщыгъуэхэр къызэрагъэпэщынущ. Мэлыжьыхьым и кIэ пщIондэ выставкэр лэжьэнущи, налшыкдэсхэм, ди хьэщIэхэм щыщ куэд абы щызэблэкIыну къыщIэкIынщ.
Сурэтыр Къарей Элинэ трихащ.
