IэнатIэщIэм ехъулIэныгъэ щиIэну

КъБР-м и Iэтащхьэ КIуэкIуэ Казбек лэжьыгъэ IуэхукIэ хуэзащ Къэбэрдей-Балъкъэрым Сабийхэм я хуиты­ныгъэхэр хъумэнымкIэ и уполномоченнэ Бэдракъ Iэминэ. 

Бэдракъ Iэминэ мэлыжьыхьым и пэм а къулыкъум теува къудейщ. ЗэIущIахэр тепсэлъыхьащ сабийхэм я хуиты­ныгъэхэр хъумэным, цIыхубэм я зыужьыныгъэм хуэунэтIа проектхэм, ахэр гъэзэщIа зэрыхъуну щIыкIэм. КIуэкIуэ Казбек и телеграм-каналым зэIущIэм щытепсэлъыхьыжащ. ­Гулъытэ щхьэхуэ хуащIащ я псэукIэкIэ щытыкIэ гу­гъум ихуа унагъуэхэм щыщ сабийхэм. Я гугъу ямыщIу къэнакъым дзэ Iуэху хэхам щыIэхэмрэ абы и ветеранхэмрэ я бынхэми. 
Бэдракъ Iэминэ иджыри къэс щылэжьащ Налшык лэ­жьыгъэмрэ социальнэ дэIэпыкъуныгъэмкIэ и центрым ­сабий унэншэхэмрэ ныбжьыщIэхэмрэ мыхъумыщIагъэм щыхъумэнымкIэ и къудамэм и унафэщIу. ЩытыкIэ гугъум ихуа, узыфэ хьэлъэ къызэуз, адэ-анэ зыщхьэщымытыж ­сабий сымаджэхэм зэрызыщIагъэкъуа псапащIэ проект куэд ирагъэкIуэкIащ Iэминэ и жэрдэмкIэ. «ДяпэкIи ап­хуэдэхэр ядэтIыгъынущ», - етх республикэм и Iэтащхьэм. 
КIуэкIуэ Казбек Бэдракъ Iэминэ хэлъ гудзакъэм, сабийхэмрэ жылагъуэмрэ папщIэ иригъэкIуэкI псапащIэ лэжьыгъэхэм щхьэкIэ фIыщIэ хуищIащ, ехъулIэныгъэ иIэу и IэнатIэр ирихьэкIыну ехъуэхъуащ.