Болэтей тхьэмадэхэр зи гъуазэ жылэ

Хабзэ, псэукIэ, зэхэтыкIэ ­дахэ зыдэлъ жылэщ Терекскэ  (Болэтей) къуажэр. Я нэхъыжьхэр я жьантIэдэсу ахэр зи гъуазэ щIэблэр жыджэру къохъу. Къуажэдэсхэм зы­щагъэгъуп­щэркъым жылэр зэфIэувэ­ным, зэIузэпэщу, зыхуей хуэ­зэу псэуным псэемыблэжу зи гуащIэр хэзылъхьахэр, нобэми абы хуэлажьэхэр.
Мы илъэсым щыщIэдзауэ, уна­фэщI­хэм я жэрдэмкIэ, абы щагъэуващ «Болэтей къуа­жэм щIыхь зиIэ и цIыху» цIэ лъапIэр. Ар япэу зыхуагъэфэ­щахэм ящыщщ мы гъэм зи ныбжьыр илъэс 90 ирикъуа Хьэгъур Хьэдисрэ нэгъабэ зи илъэс 85-р зыгъэлъэпIа Пэщол Хьэмыщэрэ. 

ЩIыпIэ самоуправленэм и советым ЩэнхабзэмкIэ унэм щригъэкIуэкIа зэхыхьэм хуабжьу щаIэтащ къуажэмрэ щIыналъэмрэ егъэфIэкIуэным зи къару куэд тезыгъэкIуэда нэхъыжьитIыр. Ахэр жыджэру сыт хуэдэ Iуэхуми зэрыхэтым, зы махуи замыгъэпсэхуу я IэнатIэр къызэрырахьэлIам, жы­лагъуэ Iуэхухэми щыпашэу ­зэ­рыщытым и щыхьэт нэсщ иджы кърата дамыгъэр. 
- Хьэгъур Хьэдисрэ Пэщол Хьэ­мыщэрэ ящыщщ лэжьыгъэкIэ, IэзагъкIэ, жэуаплыныгъэкIэ зыхэтхэм къахэщу ла­жьэу зи гъащIэ гъуэгуанэр къэзыкIу лIы щыпкъэхэм. ЦIы­хугъэ ин зыхэлъщ ди нэхъыжьыфIхэр, зэкъуэтыныгъэр, зэныбжьэгъугъэр, хэку цIы­кIур ефIэкIуэныр псом япэ изыгъэщщ. Абыхэм къызэ­ра­нэкIа гъуэгу купщIафIэр ди щIэблэм я дежкIэ щапхъэщ, - жиIащ къуажэ адми­нистрацэм и Iэтащхьэ Хъаний Заур. 
Тхьэмадэхэм куэд ехъуэ­хъуащ а махуэм, щIыналъэм щыIэ къулыкъущIапIэхэм я уна­фэщIхэми гулъытэ хуа­щIащ, фIыщIэ, щIыхь тхылъхэр хуа­гъэфэщащ. 
ЛэжьакIуэфIым и щапхъэу республикэ псом, уеблэмэ къэ­ралым щыбгъэлъагъуэ хъуну гъащIэ гъуэгуанэщ Хьэгъур Хьэдисрэ Пэщол Хьэмыщэрэ зытетри, я гъуэгур кIыхь хъуну, узыншагъэ быдэ яIэну до­хъуэхъу.