ТекIуэныгъэ Иныр илъэс 80 зэрырикъум и щIыхькIэ къызэрагъэпэща шу зекIуэ щекIуэкIащ Лашынкъей - ХьэтIохъущыкъуейм и «910-нэ лъагапIэ» гъуэгуанэм тету. Ар зи жэрдэмыр Урысейм и Суд приставхэм я федеральнэ къулыкъум и управленэу КъБР-м щыIэрщ, Шэджэм район администрацэм къыдиIыгъыу. Iуэхум щIидзэн ипэкIэ пэкIу щекIуэкIащ Лашынкъей дыхьэпIэм щыт, зауэм хэкIуэда лIыхъужьхэм я фэеплъым деж.
Iуэхум хэтащ Шэджэм район администра-цэм и Iэтащхьэ Борсэ Юрэ, Урысей ФССП-м и управленэу КъБР-м щыIэм и унафэщI Бауаев Ахъмэтрэ абы и къуэдзэ Литовкэ Натальерэ, Урысей ФСБ-м и управленэу КъБР-м щыIэм и унафэщIым и къуэдзэ Батурин Николай, къэрал кIуэцI IуэхухэмкIэ министру КъБР-м щыIэм и къуэдзэ Мамхэгъ Назир, УФССП-м и жылагъуэ советым щыщхэр, «Хэкум и хъумакIуэхэр» къэрал фондым и щIыналъэ къудамэм и унафэщI Дадэ МуIэед, зауэхэм я ветеранхэр, СВО-м хэтхэр, «Юнармия», «Пэрытхэм я зэщIэхъееныгъэ» зэгухьэныгъэхэм, нэгъуэщI жылагъуэ IэнатIэхэмрэ IуэхущIапIэхэмрэ я лIыкIуэхэр.
Литовкэ Наталье къызэхуэсахэм защыхуигъазэм къыхигъэщащ: - Ди тхыдэр хъумэныр пщIэ зыпылъ ди къалэнщ. Абы мы зэманым мыхьэнэшхуэ иIэщ, ди зауэлIхэр нацист щIэпхъаджагъэм пэщIэтщи. Мы махуэм Iэмал къыдитащ блэкIар дигу къэдгъэкIыжыным и мызакъуэу, абы и дерсхэр къытщIэхъуэ щIэблэм ягурыдгъэIуэнымкIэ.
КъБР-м щыIэ УФССП-м и жылагъуэ советым хэт Котляров Виктор къызэхуэсахэм ягу къигъэкIыжащ Къэбэрдей-Балъкъэрым и щIыналъэм зауэ хьэлъэхэр зэрыщекIуэкIар икIи ди нэхъыжьхэм я фIыгъэкIэ ТекIуэныгъэ Иным и махуэшхуэр зэрыдгъэлъапIэр.
ТекIуэныгъэм ди лъахэгъухэм хуащIа хэлъхьэныгъэр къызэхуэсахэм ягу къигъэкIыжащ ветеранхэм я «Дзэ зэкъуэшыныгъэ» урысейпсо жылагъуэ зэгухьэныгъэм и щIыналъэ къудамэм и исполкомым и унафэщI Абэнокъуэ Владимир.
Шууейхэр зрикIуэну яубзыхуа гъуэгум техьащ, ахэр езыгъэжьахэр мемориал плитам деж щытепсэлъыхьащ къэрал кIуэцI IуэхухэмкIэ органхэм я лэжьакIуэхэу Хэку зауэшхуэм хэтахэм зэрахьа лIыгъэм.
- Абыхэм я лIыхъужьыгъэр сыт щыгъуи ди гум илъынущ, ди тхыдэм къыхэнэнущ. Я лIыгъэм пщIэ худощI икIи я фэеплъыр щIэблэщIэхэм ящымыгъупщэным худоущий. НобэкIэ суд приставхэри хэтщ СВО-м икIи управленэм и гупым мазэ къэс тхузэфIэкIкIэ защIыдогъакъуэ абыхэм. Ди фIэщ мэхъу щIэуэ къэунэхужа фашизмэм дызэрытекIуэнур, ар къэблэгъэн папщIэ тхузэфIэкI псори тщIэнущ, - къыхигъэщащ Бауаев Ахъмэт.
- Къэбэрдей-Балъкъэрым и хабзэхъумэхэр Хэку зауэшхуэм и зэманым лIыгъэ яхэлъу бийм езэуащ, япэщIэтащ щIэпхъаджащIэхэм икIи жылагъуэ хабзэр хъумэнымкIэ тылым лэжьыгъэ мытынш щрахьэкIащ. Ди къалэныр сыт щыгъуи ар ди гум илъынырщ, ди ветеранхэм яхуэфащэу дыщытынырщ, - жиIащ Мамхэгъ Назир.
Зауэ зэманым къэхъуахэм я пэжыпIэр, тхыдэр хъумэным иIэ мыхьэнэшхуэм тепсэлъыхьахэщ Батурин Николайрэ Борсэ Юрэрэ.
Шэджэм Ищхъэрэм и школакIуэхэр зауэм теухуауэ къызэджа усэхэм къызэхуэсахэр хишэжат илъэс пщIей ипэкIэ къэхъуа къэхъукъащIэхэм.
УФССП-м и Жылагъуэ советым хэт Котляровэ Марие тепсэлъыхьащ «910-нэ лъагапIэ», Шэджэм Ищхъэрэ щIыпIэхэм щекIуэкIа зауэ гуащIэхэм. Абы хьэщIэ лъапIэхэм тыгъэ яхуищIащ «ЛIыхъужьыгъэм и щIыналъэ» тхылъыр.
Къызэхуэсахэр дакъикъэкIэ щымри, фэеплъым деж удз гъэгъахэр щагъэтIылъащ.
Махуэ псом лэжьащ губгъуэ пщэфIапIэр, сэлэт кашэхэр хуейхэм ирагъэшхыу. Шу зекIуэр зэриухам теухуа Iуэху дахэ щекIуэкIащ «Шагъдий» шы-спорт клубым. Абы хэтащ КъБР-м щыIэ УФССП-м и лэжьакIуэхэм я сабийхэм папщIэ къызэрагъэпэщ «Хрустальные звёздочки» зэпеуэм уэрэд жыIэнымкIэ зи зэфIэкI къэзыгъэлъэгъуахэр, клубым и шууейхэр
