Гуапэт, гушыIэрейт, гущIэгъу зыхэлът…

Хьэщэ Артур Аруан къуажэм къыщалъхуащ 1983 гъэм. Ку­рыт еджапIэр къиуха нэужь, юрист IэщIагъэм хуе­джащ, итIа­нэ пIалъэкIэ ­хэтащ ОМОН-м. 

2014 гъэм Артур унагъуэ дахэ иухуащ. Къахэхъуащ хъы­джэбз цIыкIурэ щIалэ цIыкIурэ. И унагъуэм хуэгумащIэт, щIэ­хъуэпсырт дунейр яригъэлъа­гъуну. Хъыджэбзыр игъафIэрт, щIалэм ткIийуэ зыкъыщигъэ­хъуну хэтт. Сабийхэм адэр я ­гъуазэт, я щапхъэт, я лIыхъужьт. Артур сыт щыгъуи жиIэу щытащ, пхъу иIэмэ, и щхьэцыр ­хуиухуэну зригъэсэну. Аращ зэрыхъуари, и хъыджэбз гъэ­фIэ­ным и щхьэцыр хузэщIи­къуэрт, хуиухуэнырт. Сабий фIыуэ илъагъурт, езыхэми зыхащIэ хуэ­дэт абы и псэм и хуабагъэр - къаухъуреихьырт цIыкIухэм. Абы къагурыIуэн, зыхащIэн бзэ щабэт зэрадэуэршэрыр. 
И адэ-анэм, и Iыхьлыхэм жаIэж щыцIыкIум ар дырийпсырийуэ, «жьым тесу псым епыджу» зэрыщытар. Сабий садым кIуэн фIэфIтэкъым, и шыпхъухэм я гъусэу унэм щIэсмэ нэхъ къищтэрт. «Артур зэрану е дыхьэшхыу макъ къэмыIумэ, зыгуэр зэхищIыхьри зиущэхужауэ арат е къэлъыхъуэн хуейт», - игу къегъэкIыж и анэм. 
Хьэблэ щIалэ цIыкIухэм ящIыгъуу мэзым кIуэхэрт мэракIуэ, дэ къахьыну. ИужькIэ жиIэжырт езыхэр здынэсу щыта щIыпIэхэм иджырей сабийхэр мыкIуэфыну. Абыхэм я сабиигъуэр зыхиубыда зэманкIэ зэхуэмыдэу жиIэрт. 
Артур хуабжьу фIэфIт бдзэжьеящэ кIуэну. Сыхьэт бжыгъэкIэ ­къунтхыр иIыгъыу псы Iуфэм Iусыфынут. Бдзэжьей къимыубыд щхьэкIи игу ныкъуэтэкъым, ещэнрат фIэфIыр. КъиубыдаIамэ, ­Iэмал имыIэу езым ипщэфIынут. IэфIу пщафIэрти, жиIэрт я нэхъ унэгуащэ Iэзэми пщэфIэнкIэ пеуэфыну.
СВО-р къэхъеиным ипэ, Хьэщэ Артур ухуакIуэу лажьэрт. Езыр щIалэ Iэчлъэч-зэIэщIэлъти, гугъуехьхэми лэжьыгъэми щышы­нэртэкъым. ЩIалэр зыхэт лэжьакIуэ гупым фIыуэ къалъагъурт, «Артур къытхэмыту ди бригадэм ищIэн щымыIэ», - жаIэрт, лэжьапIэм щымыкIуа къэхъуамэ. ГушыIэрейт, ныбжьэгъу и куэдт, гупыр зыгъэгупт. И цIыху щIыкIэкIэ щабэт. ЦIыхухэм сэбэп яхуэхъуну фIэфIт, нэгъуэщIым и ехъулIэныгъэм щыгуфIыкIыфырт, и гуны­къуэгъуэр зыхищIэрт.
2022 гъэм и мазаем Украинэм къыщыхъеящ дзэ Iуэху хэхар. 2023 гъэм и фокIадэм Артур СВО-м кIуащ. Куэд дэмыкIыу уIэгъэ хъури, и узыншагъэм кIэлъигъэплъыну къаутIыпщыжащ щIалэр. И ­узыншагъэр зэтеувэжри, игъэзэжащ. 2024 гъэм и пэщIэдзэм абы хэкIуэдащ.