Къэрал программэхэр
Урысей Федерацэм и Президентым къыдигъэкIа унафэм къызэрыщыгъэлъэгъуамкIэ, 2030 гъэм ирихьэлIэу ди къэралым хыхьэ щIыналъэхэм я районхэм я къалащхьэхэм ущыпсэун щхьэкIэ щыIэ Iэмалхэмрэ инфраструктурэмрэ процент 30-кIэ, 2036 гъэм – процент 60-кIэ ирагъэфIэкIуэн хуейщ. А лэжьыгъэхэр ирагъэкIуэкI «ГъащIэм хуэщIа инфраструктурэ» лъэпкъ пэхуэщIэм ипкъ иткIэ, жиIащ иджыблагъэ УФ-м и Правительствэм и УнафэщIым и къуэдзэ Хуснуллин Марат.
«ЩIыналъэхэм я къалащхьэу апхуэдэ Iуэхугъуэхэм къызэщIрагъэубыдэну ягъэхьэзыра дэфтэрым щIыпIэ 2160-рэ хэхуащ. Абыхэм къетIысэкIа къуажэ-жылэхэр хэбгъэхьэу щытмэ, къэрал псо мэхъу. А спискэм хэтщ щIыналъэхэм я къалащхьэхэмрэ абыхэм къепха къалэ цIыкIухэмрэ, псори зэгъусэу 212-рэ. Апхуэдэуи абы хэхуащ инвестицэ пэхуэщIэ инхэр щагъэзащIэ центри 183-рэ, къэралым и шынагъуэншагъэм пыщIа, ар къызэзыгъэпэщ щIыпIэу 217-рэ, къалащхьэхэм я щыIэкIэ-псэукIэр зэтезыIыгъэ къуажэ щIыпIэу 1548-рэ. ЖыпIэнурамэ, а спискэм хэхуам я нэхъыбэр къалэ цIыкIухэрщ, поселкэхэмрэ къуажэхэмрэщ. ЦIыхухэм я псэукIэр егъэфIэкIуэным хуэунэтIауэ лажьэ программэм ахэр псори хагъэхьэнущ», - жиIащ Хуснуллин Марат.
Вице-премьерым апхуэдэуи къыхигъэщащ унэтIыныгъэу 16 а программэм къызэрызэщIиубыдэр. Псалъэм къыдэкIуэу, абы хохьэ цIыхухэр псэупIэкIэ къызэгъэпэщыныр, ущыпсэуну шынагъуэ хъуа унэхэм щIэсхэм псэупIэ щхьэхуэхэр етыныр, коммунальнэ Iуэхутхьэбзэхэм я фIагъыр, уэрам, автомобиль гъуэгухэр зыхуей хуэгъэзэныр, жылагъуэ транспортым и лэжьыгъэр тэмэму зэтеухуэныр. Апхуэдэуи абы хэтщ къалэ, къуажэ щIыпIэхэр зэIузэпэщ щIыныр, абыхэм газыр ешэлIэныр, интернеткIэ ахэр къызэгъэпэщыныр.
Программэм къыщыгъэлъэгъуа Iуэхугъуэхэр гъэзэщIа хъун папщIэ, щыIэ Iэмалхэм ящIыгъуу нэгъуэщI мылъку къыхэкIыпIэщIэхэр абы къыхуагъэсэбэпынущ, псалъэм папщIэ, инфраструктурэмкIэ облигацэхэмрэ худэчых зыхэт кредитхэмрэ. Гугъэ зэрыщыIэмкIэ, бюджет ахъшэмрэ къэралым худэчых зыхэт и кредитхэмрэ апхуэдэ Iэмалхэм хуэмурэ зэрахъуэкIынущ, абы и фIыгъэкIи, щIыналъэхэм я пэхуэщIэхэм инвесторхэм я мылъку нэхъ тыншу къыхашэф хъунущ.
УФ-м щIыналъэхэм зегъэужьынымкIэ и фондым и унафэщI Шагиахметов Ильшат зэрыжиIамкIэ, IэмалыщIэхэм ефIэкIыныгъэу яIэр зыхуэдэр щIыналъэхэм зэхащIакIэщ. ЖыпIэнурамэ, инфраструктурэмкIэ облигацэхэмрэ худэчых зыхэт кредитхэмрэ ехьэлIауэ 2022 гъэм щегъэжьауэ лажьэ программэмкIэ объект 630-м щIигъум лэжьыгъэ пыухыкIахэр щрагъэкIуэкIащ, къалэ, къуажэ щIыпIэ куэдым я коммунальнэ Iуэхутхьэбзэхэр, инфраструктурэхэр щрагъэфIэкIуащ.
Къэралым и щIыналъэхэм я районхэм я къалащхьэхэм, къалэ цIыкIухэм, къуажэ щIыпIэхэм программэм ехьэлIа я Iуэху еплъыкIэхэр яIэжщ. Псалъэм папщIэ, къалэ цIыкIухэм нэхъыбэу зытрагъащIэр социальнэ инфраструктурэрщ, щIалэгъуалэр абыхэм къыдэмыкIыу щыпсэуным, щылэжьэным трагъэгушхуэн щхьэкIэ. Къалэ нэхъ инхэр хущIэкъунущ я экономикэм и фIагъым хагъэхъуэн папщIэ, щIэныгъэ-техникэ унэтIыныгъэм зрагъэужьын щхьэкIэ, инвестицэхэр кърашэлIэну. Къэралым и шынагъуэншагъэр къызэзыгъэпэщ, абы пыщIа щIыпIэхэм мыхьэнэ нэхъыбэ зратыр я цIыхухэм я псэукIэр егъэфIэкIуэнырщ, экономикэм пыщIа IэнатIэщIэхэр абыхэм къыщызэIухынырщ.
Гугъэ щыIэщ апхуэдэ Iуэху бгъэдыхьэкIэм кърикIуэу щIыналъэхэм я щыIэкIэ-псэукIэр нэхъ тынш хъуну, лэжьыгъэ IэнатIэщIэхэр дэнэ щIыпIэкIи къыщызэрагъэпэщыну, къэралым и социально-экономикэ щытыкIэм фIы и лъэныкъуэкIэ зихъуэжынми и сэбэп екIыну.
