Дахагъэм и къарур

Урысей Федерацэм хьэрычэт IэнатIэ мащIэмрэ курытымрэ щыщу зыкIэлъыплъыжыным, загъэдэхэным пыщIа Iуэхутхьэбзэхэр цIыхухэм яхуэзыщIэ IуэхущIапIэхэм щылажьэхэм я бжыгъэр мини 113,6-м щIигъуащ. ЖыпIэнурамэ, мы гъэм и щIышылэ - мэлыжьыхь мазэхэм абыхэм мин 30-м щIигъу къахэхъуащ, я процент 96-м щIигъур унейуэ. Апхуэдэу щыхъукIи, ахэр къызэIузыха хьэрычэтыщIэхэм я нэхъыбэм я ныбжьыр илъэс 35-м щIигъуакъым, къыщыхагъэщащ МСП Корпорацэм иджыблагъэ иригъэкIуэкIа къэпщытэныгъэхэм.

«Дэ долъагъу зыгъэдэхэным пыщIа IэнатIэм жыджэру зэрызиужьым щIалэгъуалэм я фIыгъэ зэрыхэлъыр. Иужьрей илъэсищым апхуэдэ IуэхущIапIэхэм процент 14-кIэ хэхъуащ 2022 гъэм елъытауэ. Абы щыгъуэ мини 100-щ ахэр зэрыхъуар. 
Зи ныбжьыр илъэс 35-м щIимыгъуа хьэрычэтыщIэхэм уней IуэхущIапIэхэр жыджэру къызэIуах иужьрей илъэсхэм. МСП-м зыкIэлъыплъыжыным пыщIауэ лажьэ и IуэхущIапIэхэм я процент 35-м щIигъур къызэIузыхар ахэращ. Хьэрычэт IэнатIэ мащIэмрэ курытымрэ псори зэхэту къапщтэмэ, щIалэгъуалэ нэхъыбэ щылажьэр а IэнатIэрщ, процент 25-рэ мэхъу», - жиIащ МСП Корпорацэм и унафэщI Исаевич Александр. 
Иджыпсту а IэнатIэм хэт IуэхущIапIэхэм я нэхъыбэм цIыхухэм Iуэхутхьэбзэхэр я унэхэм щыхуащIэ хъуащ е зыгъэдэхэным пыщIа Iуэхутхьэбзэ псори зы щIыпIэ хэхам деж щыхуащIэ. Зэрыхабзэу, апхуэдэ хьэрычэтыщIэхэм я нэхъыбэм я щхьэ хуэлэжьыжыну налогхэх IэнатIэхэм зыщрагъэтх. Урысейм НалогхэмкIэ и федеральнэ къулыкъум зыщезыгъэтхахэр нобэкIэ цIыху мин 452-рэ мэхъу.
ЗыкIэлъыплъыжыным, загъэдэхэным пыщIауэ псори зэхэту ди къэралым щылажьэ IуэхущIапIэхэм я нэхъыбэр щатхар Мэзкуу къалэрщ (процент 11). АдэкIэ къокIуэ Мэзкуу областыр (проценти 8), Санкт-Петербург къалэр, Краснодар крайр, Свердловск областыр (псоми процент тхурытху яIэу).
Къэбэрдей-Балъкъэрыр къэдгъэлъагъуэмэ, а унэтIыныгъэм щылажьэ и IуэхущIапIэхэр 262-рэ мэхъу е республикэм и хьэрычэт IэнатIэ мащIэмрэ курытымрэ хэтхэм я процент 1,2-рэ. Я щхьэ хуэлэжьэжыну абы зыщезыгъэтхахэр цIыху 5465-рэ мэхъу е апхуэдэ IэмалкIэ лажьэ гупым я проценти 6,4-рэ.
Фигу къэдгъэкIыжынщи, хьэрычэт IэнатIэ мащIэмрэ курытымрэ я щхьэ хуэлэжьэжыну зезыгъэтхахэмрэ къэрал дэIэпыкъуныгъэхэр ират «Зэхьэзэхуэр зи лъабжьэ экономикэ лъэщ» лъэпкъ пэхуэщIэм хыхьэ «Хьэрычэт IэнатIэ мащIэмрэ курытымрэ» къэрал пэхуэщIэм ипкъ иткIэ.