Хагъахъуэурэ макIуэ

2025 гъэм и щIышылэм - мэлыжьыхьым Урысей Федерацэм макаронхэкIыу тонн зы мелуан ныкъуэм щIигъу къыщыщIагъэкIащ. Нэгъабэ и апхуэдэ пIалъэм нэхърэ ар проценти 3-кIэ нэхъыбэщ. А ерыскъыхэкIым щыщу хамэ къэралхэм иращам къыпэкIуам хуэдищкIэ хагъэхъуащ, и куэдагъым - процент 16-кIэ. 
Макароным и Iыхьэ ныкъуэр гуэдз лъэпкъыфIым - «быдэм» - къыхащIыкIащ икIи иужьрей илъэсищым апхуэдэ продукцэм и куэдагъым хуэдищкIэ хагъэхъуащ. IэщIагъэлIхэм зэрыжаIэмкIэ, дунейм и щытыкIами ифI екIащ а Iуэхум.
УФ-м МакаронхэкIхэр къыщIэзыгъэкIхэм я лъэпкъ зэгухьэныгъэм гугъэ ещI апхуэдэ ерыскъыпхъэу ягъэхьэзырым и куэдагъым илъэс къэс процент 1-2-кIэ яхухэгъэхъуэну.
Къэбэрдей-Балъкъэрым Мэкъумэш хозяйствэмкIэ и министерствэм къызэритамкIэ, макаронхэкIхэр республикэм къыщыщIэзыгъэкI «Хлебный Дар» заводым дызэрыт илъэсым и щIышылэм - накъыгъэм къриубыдэу продукцэу тонн 1,8-рэ ящIащ.