ГукъэкIыжхэр унагъуэхэм щахъумэ

Налшык къалэм и Бзылъхугъэхэм я зэгухьэныгъэм Унагъуэм, лъагъуныгъэм, зэхуэпэжыным я махуэм ирихьэлIэу къызэригъэпэщащ «Хэку зауэшхуэм теухуа гукъэкIыжхэр унагъуэхэм щахъумэ» зыфIаща зэхыхьэр. Ар къыхалъхьащ «Хэку зауэшхуэм теухуа тхыдэ фэеплъыр унагъуэхэм щытхъумэнщ» Iуэхум хыхьэу.

Кулиев Къайсын и цIэр зезыхьэ Балъкъэр къэрал драмэ театрым ирагъэблэгъащ дзэм къулыкъу щызыщIэ щIалэхэм я Iыхьлыхэр, «Дружная семья – успешная семья» зэпеуэм щытекIуа унагъуэхэр, «Лъэпкъ жыг нэхъыфI» зэхьэзэхуэм пашэ щыхъуа еджакIуэхэр, къалэм и Пенсионерхэм, Бзылъхугъэхэм я зэгухьэныгъэхэм щыщхэр, КъБКъУ-м студентхэр.

Налшык къалэм и Бзылъхугъэхэм я зэгухьэныгъэм и унафэщI Дыджэш Лидэ къыщыпсалъэм къыхигъэщащ зэхыхьэр Хэку зауэшхуэм ТекIуэныгъэ Иныр ди къэралым къызэрыщихьрэ илъэс 80 зэрырикъумрэ Хэкум и хъумакIуэхэм я илъэсымрэ я щIыхькIэ къызэрыхалъхьар.

- Унагъуэм и лъапIэныгъэхэр хъумэныр ди IуэхущIапIэм и къалэн нэхъыщхьэхэм ящыщ зыщ. Абы хыхьэу мы гъэм догъэзащIэ «Хэку зауэшхуэм и тхыдэ фэеплъхэр унагъуэхэм щытхъумэнщ» Iуэхур. Ар къалэ администрацэми къыддиIыгъащ. «Дружная семья – успешная семья», «Лъэпкъ жыг нэхъыфI» зэпеуэхэм щытекIуахэр мыбдеж щыдгъэлъэпIэнущ. Иужьрейр къызэгъэпэщынымкIэ лэжьыгъэшхуэ иригъэкIуэкIащ курыт еджапIэ №15-м и унафэщIым егъэджэныгъэ-гъэсэныгъэ лэжьыгъэхэмкIэ и къуэдзэ, Налшык къалэм и Бзылъхугъэхэм я зэгухьэныгъэм и къудамэу Белая Речкэ къуажэм щыIэм и унафэщI Созаевэ Зухра. Лэжьыгъэ нэхъыфIхэр щIыхьэпIэм деж щыдогъэлъагъуэ, - жиIащ Дыджэш Лидэ. – Дзэ Iуэху хэхам щыIэ щIалэхэм я унагъуэхэм фIыщIэ яхудощI. Ди фIэщ мэхъу ди зауэлIхэм текIуэныгъэ къызэрахьынур.

Дыджэшым зи гугъу ищIа зэхьэзэхуэхэм щытекIуахэр чэзууэ утыку кърашэурэ ягъэлъэпIащ. ЯпэщIыкIэ еджакIуэхэм я цIэ ираIуащ. АдэкIэ утыкур хуит хуащIащ унагъуэ нэхъыфIхэм. Апхуэдэу къалъытащ Урысей гвардием и къудамэу КъБР-м щыIэм и Управленэм и «Вершина» ОМОН-м къулыкъу щызыщIэ Бачиев Хъусейрэ и щхьэгъусэ ФатIимэтрэ. ФатIимэт КъБР-м къабзагъэмрэ эпидемиологиемкIэ и центрым щолажьэ, бынищ яIэщ. ЯгъэлъэпIахэм ящыщщ КъБР-м щIыхь зиIэ и журналист, УФ-м и Журналистхэм я зэгухьэныгъэм хэт, илъэс 40 хъуауэ а IэнатIэм пэрыт Гериев Сэфар и унагъуэр. И щхьэгъусэ Маринэ Налшык къалэм и курыт еджапIэ №6-м и унафэщIым гъэсэныгъэ IуэхухэмкIэ и къуэдзэщ. Я къуэ Ислъам Налшык къалэ администрацэм щолажьэ. АдэкIэ зи цIэ ираIуа Жэмыхъуэхэ Анзоррэ Тамарэрэ быниплI яIэщ. Анзор «Югстройресурсы» ООО-р къызэригъэпэщащ. Тамарэ КъБКъУ-м и педколледжым щрегъаджэ. Хъыдзэджхэ Азэмэтрэ Iэминэрэ бынитI зэдапI. ЩIалитIым я адэ Азэмэт сыткIи я щапхъэщ, мы зэманым дзэ Iуэху хэхам къулыкъу щещIэ. Iэминэ Налшык къалэ судым щолажьэ. Бэрэгъунхэ Щыхьэрбийрэ Масирэтрэ щIалиплI яIэщ. Щыхьэрбий «Телемеханика» заводым илъэс куэдкIэ радиомонтажникыу щылэжьащ. Масирэт Кэнжэ къуажэм и сабий гъэсапIэм илъэс 40-м нэблагъэкIэ и гъэсакIуэу щытащ.

Зэпеуэхэм щытекIуахэм ехъуэхъури, дамыгъэ лъапIэхэр иратыжащ КъБР-м и Iэтащхьэм и лIыкIуэ Сарбашевэ Светланэ, КъБР-м и Парламентым и депутат Беспаловэ Татьянэ, Налшык къалэм и избиркомым и унафэщI Нало Николай, «Трудовая доблесть России» урысейпсо зэгухьэныгъэм и щIыналъэ къудамэм и унафэщI Бондарев Леонид.

Пшыхьыр ягъэдэхащ ГъуазджэхэмкIэ Кавказ Ищхъэрэ къэрал институтым Щэнхабзэмрэ гъуазджэмкIэ и колледжым и студентхэмрэ ар къэзыухахэмрэ, «Дети гор» къэфакIуэ, уэрэджыIакIуэ ансамблым (художественнэ унафэщIыр Кушмэзокъуэ Албэчщ).