МурадыфIхэр яIэщ

КъБР-м Курортхэмрэ туризмэмкIэ и министерствэм къыщызэщIакъуэжащ 2025 гъэм щIыналъэм а IэнатIэм зэрызрагъэужьыфыну Iуэхухэр къыщагъэлъэгъуа зэпеуэр.

Абы пхыкIахэм яхэтщ Кизиловкэ бгым зэрыдэкI лъагъуэр зэIузэпэщ зэращIыну жэрдэмыр. Къэбгъэлъагъуэмэ, терренкурыр Налшык и зыгъэпсэхупIэм щIэупщIэшхуэ щызиIэщ, щIыпIэр къалэдэсхэми хьэщIэхэми фIыуэ ялъагъуу.  

Курортхэмрэ туризмэмкIэ министр Быф Аскэр къыхегъэщ: «Мы жэрдэмыр дгъэзэщIэным мыхьэнэшхуэ иIэщ къалэм и мызакъуэу, республикэ псом и дежкIи. Апхуэдэ сэбэпынагъ зыпылъ щIыпIэр зэгъэпэщыжын зэрыхуейм куэд щIауэ дегупсысырт, и хэкIыпIэхэми мызэ-мытIэу дыхэплъащ. Апхуэдэу мы гъэм тедухуащ «Туризмэмрэ хьэщIагъэмрэ» лъэпкъ Iуэхум хыхьэу абы текIуэдэну ахъшэр къыхэгъэкIыныр. Проектыр ныкъусаныгъэншэу зэрызэхэгъэувами и фIыгъэу къызолъытэ абы текIуэныгъэ къызэрихьар. А щIыпIэр зэIузэпэщ щIыным министерствэм сом мелуан 52-рэ хухихынущ. Дыщогугъ етIанэгъэ лэжьыгъэ псори абы щызэфIэкIыу, цIыхухэр игъэгуфIэну».

Министрым къызэрыхигъэщамкIэ, лъагъуэр зэрагъэпэщыжмэ, абы къыщыпкIухьынри спорт Iуэхухэр щебгъэкIуэкIынри нэхъ тынш, нэхъыфI хъунущ, я узыншагъэр ирагъэфIэкIуэнми нэхъыбэ дригъэхьэхынущ.

Жэрдэмыр республикэм щыпсэухэм къыхалъхьащ - абыхэм яхэтщ архитекторхэри, дизайнерхэри, маркетологхэри.

Зэпеуэм ипкъ иткIэ, республикэм и зыгъэпсэхупIэхэм зезыгъэужьыну Iуэхуищ къэпщытакIуэхэм къыхахащ. Кизиловкэ зэрыдэкI лъагъуэм зэрелэжьыным нэмыщI, бассейнхэри яухуэну я мурадщ.