Гъуэгухэр
«ГъащIэр нэхъ тынш зыщI ухуэныгъэхэр» зыфIаща лъэпкъ пэхуэщIэм и унэтIыныгъэ нэхъыщхьэхэм ящыщщ къуажэ пхыдзахэм икIи нэхъ цIыкIухэм езышалIэ-япхрыкI автомобиль гъуэгухэр егъэфIэкIуэныр.
Iуэхур зытещIыхьар жылэ цIыкIухэм социальнэ мыхьэнэ щызиIэу дэт курыт еджапIэхэм, сабий садхэм, узыншагъэр хъумэным хуэлажьэ IуэхущIапIэхэм уабгъэдэзышэ зекIуапIэхэр иджырей мардэхэм къитIасэу къэгъэщIэрэщIэжынырщ, зыхуей хуэгъэзэнырщ.
Зи гугъу тщIа пэхуэщIэм хыхьэу, япэ игъэщыпхъэу гъуэгуухуэхэм къалъытэр, зэрыжытIащи, къуажэ цIыкIухэу щIыпIэ пхыдзахэм щыIэхэм ящыщу гъуэгу тэмэм зыбгъэдэмыхьэхэм е жьы хъуахэм иджырей мардэхэм къитIасэ асфальтыщIэ телъхьэнымрэ я щытыкIэр шынагъуэншагъэм хуэгъэкIуэнымрэщ, а псом къыхэкIыуи, а жылэхэм дэсхэм я гъащIэр нэхъ тынш щIынымрэ я псэукIэр егъэфIэкIуэнымрэщ.
Апхуэдэу, Тэрч щIыналъэм хыхьэ Дей жылэмрэ Курп Ищхъэрэмрэ (иужьрейм цIыху 1400-м нэблагъэ дэсщ) зэпызыщIэ автомобиль зекIуапIэу Осетие Ищхъэрэ–Аланием и гъунапкъэм еуалIэм и кIыхьагъкIэ, мы зэманым ирихьэлIэу, асфальтым и лъабжьэ Iыхьэр тралъхьакIэщ, езы къуажэхэм иджырей мардэхэм къитIасэ лъэс зекIуапIэхэр щаукъуэдиящ.
Лэжьыгъэр щыщIагъэхуабжьэ республикэм и Аруан щIыналъэм хыхьэ къуажэхэу Шытхьэлэрэ Мэрзэхъурэ (дэтхэнэми цIыху 1200-м нэблагъэ щопсэу) уезышалIэ автомобиль гъуэгухэми. Мыбыхэм асфальтым и етIуанэ Iыхьэр щытралъхьауэ, лъэныкъуитIымкIи шынагъуэншагъэм тещIыхьа нагъыщэхэр щагъэув.
IэщIагъэлIхэм иджырей мардэхэм къитIасэу мы зэманым къэгъэщIэрэщIэж Старэ Шэрэдж – Жэмтхьэлэ - Сукан-Суу автомобиль зекIуапIэри. Километри 6 зи кIыхьагъ а гъуэгум, къуажэхэу Псыгуэнсурэ Зэрэгъыжрэ зэрызэпищIэм къыдэкIуэу, я дыхьэпIэхэри къегъэщIэрэщIэж.
Гулъытэншэу къагъэнакъым Май щIыналъэм хыхьэ, цIыху миным щIигъу зыдэс Октябрьскэ жылэм убгъэдэзышэ автомобиль зекIуапIэри. Налшык – Май къалэ гъуэгум щыщу километри 3,6-рэ зи кIыхьагъым зыгъэбыдэ лэжьыгъэхэр щрагъэкIуэкI, асфальтыщIэ тралъхьэ.
Ауэ щыхъукIи, «ГъащIэр нэхъ тынш зыщI ухуэныгъэхэр» пэхуэщIэм хыхьэ дэтхэнэ зы лэжьыгъэри лъэбакъуэщIэщ икIи IэмалыфIщ къуажэ пхыдзахэм икIи нэхъ цIыкIухэм щыпсэухэр дунейм къапыщIэнымкIи я гъащIэр нэхъ тынш щIынымкIи.
