Кавказыр хуит къэзыщIыжахэр ягу къагъэкIыж

Хэку зауэшхуэр щекIуэкIым Кавказыр хуит  къэзыщIыжа, а зауэзэрылIым хэкIуэда сэлэтхэмрэ офицерхэмрэ ягу къагъэкIыжащ Урысей гвардием и Управленэу КъБР-м щыIэм и лэжьакIуэхэмрэ ветеранхэмрэ.

Iуэхур щекIуэкIащ Налшык зыхъумахэмрэ хуит къэзыщIыжахэмрэ я фэеплъым деж. Къызэхуэсахэм ягу къагъэкIыжащ ди щIыналъэм щекIуэкIа зауэм  ТекIуэныгъэ Иныр зыIэрыгъэхьэнымкIэ  мыхьэнэшхуэ зэриIар.

- Армэ Плъыжьым хэтхэм я лIыхъужьыгъэмрэ хахуагъэмрэ я фIыщIэкIэ зэрыпхъуакIуэхэм Iэмал иратакъым Кавказыр къащтэну.  Ди щхьэхэр  лъахъшэу яхудогъэщхъ хъумакIуэ псоми, гум имыхуж абыхэм я лIыгъэр, а зауэм и лIыхъужьхэм я фэеплъыр иренэху, - жиIащ полицэм и полковник Хужьокъуэ Руслан.