ЯхузэфIэкIахэмрэ къалэныщIэхэмрэ

КъБР-м и Iэтащхьэ КIуэкIуэ Казбек лъэпкъ, къэрал про­ектхэр гъэзэщIа зэрыхъум, инфраструктурэ ухуэныгъэ­хэр зэIузэпэщ зэращIым, республикэм и бюджетыр илъэ­сым и япэ Iыхьэм къызэрагъэщхьэпа щIыкIэм теухуауэ Правительствэм совещанэ дригъэкIуэкIащ.

«Иужьрей зэманым ди экономикэр йофIакIуэ, абы дытетщ, - иритхащ КIуэкIуэ Казбек и телеграм-каналым. - Бжыгъэхэм ятетщIыхьмэ, илъэс блэкIам и япэ Iыхьэм елъытауэ, промышленнэ хьэпшып къы­щIэзыгъэкI IэнатIэм и индек­сыр проценти 8-кIэ хэхъуащ, мэкъумэш хозяйствэм ейр - проценти 4,6-кIэ, ухуэныгъэм ейр - проценти 4,1-кIэ. Мазихым къриубыдэу республикэм турист мин 912-м зыщагъэп­сэхуащ, ар блэкIа илъэсым елъы­тауэ процент 14,8-кIэ нэхъыбэщ. 
Республикэм и бюджетым ­хэхъуэу иIэр илъэс блэкIам и япэ Iыхьэм елъытауэ процент 19-кIэ нэхъыбэщ. Экономикэр езыгъэфIакIуэ щхьэусыгъуэ­хэм хохьэ лъэпкъ, къэрал ­проектхэр. Дызэрыт илъэсым щIыналъэм проект 41-рэ щолажьэ. Республикэр къэ­ра­лым щы­пэрытитхум яхеу­бы-дэ. 
Лъэпкъ проектхэм мы илъэ­сым сом мелард 11,2-рэ то­кIуадэ. Абыхэм ящыщу меларди 7,7-р къэралым къеутIыпщ, республикэм сом меларди 3,5-рэ къыбгъэдокI. Илъэсым и япэ Iыхьэм зэфIэдгъэкIыну зыхуэдгъэувыжа къалэн псори зэдгъэхъулIащ. 
Къэрал программэхэр гъэ­зэщIа зэрыхъум я гугъу тщIы­мэ, ахэр 26-рэ мэхъу, бюджетым щыщу сом мелард 65,3-рэ яхуозэ. Абыхэм ящыщу 18-р къэралым къыбгъэдокI, мелард 47,3-р республикэм и мылъкум къыхокI. Процент 70-р зыхуэунэтIар цIыхубэр зыхуей хуэзэн папщIэ ирагъэкIуэкI лэ­жьыгъэхэрщ». 
Совещанэр щригъэкIуэ­кIым, КIуэкIуэ Казбек гулъытэ нэхъ хуищIащ псэупIэ-ком­мунальнэ хозяйствэм зэфIигъэкI Iуэху­гъуэхэм, псом хуэ­мыдэу, цIыху­хэр псыкIэ къызэгъэпэщыным епха лэжьы­гъэхэмрэ пхъэнкIий гъущэр зэ­рыдашымрэ. «Мыр нэхъ ­гугъу, гулъытэ нэхъыбэ зыхуей лъэныкъуэхэм ящыщщ, нэхъ кIылъыплъын, унафэщI­хэри нэхъ хуэсакъын хуейщ», - жи­Iащ Iэтащхьэм икIи унафэ хэхахэр ищIащ. 
КъинэмыщIауэ, зэIущIэм щы­тепсэлъыхьащ зэрахьа, зэIу­зэпэщ ящIыжа IуэхущIа­-пIэ з­ыбжанэм лэжьэн зэ­рыщIа­дзэжым, Къэбэрдей-Балъ­къэ­рым и Къэралыгъуэм и махуэр зэрагъэлъэпIэну щIы­кIэм.