Илъэсым къигъэлъэгъуэнущ

Дызэрыт илъэсым и кIэм УФ-м и щIыналъэхэм ящыщу 79-м экономикэ хэхъуэхэр къагъэлъэгъуэн хуейщ. Урысей Федерацэм 2026 гъэм игъуэтыну социально-экономикэ зыужьыныгъэмрэ 2027 - 2028 гъэхэм къапэщыт къалэнхэмрэ ехьэлIауэ УФ-м Экономикэ зыужьыныгъэмкIэ и министерствэм игъэхьэзыра программэм къыщыгъэлъэгъуащ апхуэдэу.

ЩIыналъэ валовэ продуктым (ВРП) къызэрыхэхъуэм и псынщIагъымкIэ Чукоткэр мы гъэм япэ ищыну къалъытэ, процент 20,8-рэ къигъэлъагъуэу. Апхуэдэуи Калугэ областыр (проценти 7,7-рэ), Адыгейр (7,3-рэ), Удмуртыр (5,6-рэ), Къэбэрдей-Балъкъэрыр (5,5-рэ), Севастополь къалэр (5,3-рэ) пэрытхэм яхыхьэфыну хуагъэфащэ илъэсым и кIэм ирихьэлIэу.

ВРП-м къызэрыхэхъуэм и псынщIагъымкIэ зи Iуэхур мыщIагъуэхэм яхэту программэм къыщыгъэлъэгъуащ Кемеровэ областыр (-4,1-рэ), Коми республикэр (-3,3-рэ), Красноярск крайр (-2,5-рэ).

Экспертхэм зэрыжаIэмкIэ, щIыналъэхэм экономикэм щаIэ ехъулIэныгъэхэр зэрызэщхьэщыкIыр къэхъукъащIэ егъэлея гуэру щыткъым, къэралым и инагъыр къэплъытэу щытмэ. ВРП-р зэрызэхуэмыдэм щхьэусыгъуэ хуохъу языныкъуэ щIыналъэхэм IэнатIэ ехьэжьахэр, щIыуэпсым и хъугъуэфIыгъуэхэр нэхъыбэу зэраIэм, къимыдэкIэ, транспорт инфраструктурэр, инвестицэхэр дэнэ щIыпIэкIи зэхуэдэу зэрыщымыIэм, зэрызамыужьам.

ВРП-м зэрыхэхъуэнум и псынщIагъэр куэдкIэ елъытащ щIыналъэхэм щыщыIэ дуней щытыкIэхэм, икIи, щIыналъэм и социально-экономикэ IэнатIэхэм зегъэужьыным ехьэлIауэ властхэм сыт хуэдэ лэжьыгъэ ирамыгъэкIуэкIами, къэрал дэIэпыкъуныгъэхэр ямыгъуэтами, мис абыхэм Iуэхур къалъахъэ.

Ауэ, сыт хуэдэ лъэпощхьэпохэр щымыIами, щIыналъэхэм зыужьыныгъэ ягъуэтын папщIэ, къэрал дэIэпыкъуныгъэхэр сыт и лъэныкъуэкIи зэхуэдэу щытын, бизнесым зэрызиужьын IэмалыщIэхэр дэнэ щIыпIи къыщызэрагъэпэщын хуейщ.