Хъыбар кIэщIхэр

И кIэм ноблагъэ

Май къалэмрэ Тэрч районым и Урожайнэ къуажэмрэ зэпызыщIэ, адэкIэ Осетие Ищхъэрэ – Аланием и гъунапкъэм екIуалIэ автомобиль гъуэгум телъ лъэмыжыр, метри 162-рэ зи кIыхьагъыр, зэгъэпэщыжыным ехьэлIа лэжьыгъэхэр и кIэм нэблэгъащ.

НобэкIэ, лэжьакIуэхэм лъэмыжым и лъабжьэр ягъэбыдащ, асфальтрэ бетонрэ зэхэщIауэ гъэгум тралъхьащ. Иджыпсту, псыр Iузыш системэхэр ягъэув, псы жапIэр кърагъэбыдэкI.

Лэжьыгъэхэр зэрызэфIэкIыу, а щIыпIэм къыпекIуэкIыу пIалъэкIэ ящIа гъуэгумрэ лъэмыжыжьымрэ Iуахыжынущ.

IыхьитIу гуэшауэ 

«Коммунальнэ инфраструктурэр егъэфIэкIуэн» къэрал пэхуэщIэм ипкъ иткIэ Шэджэм къалэм и Кабардинскэ, Алъхъэсым и цIэр зезыхьэ уэрамхэм псы къабзэ зэрыкIуэ бжьамийхэр щаукъуэдий, псори зэхэту километри 2,6-рэ я кIыхьагъыу.

ПэхуэщIэр хуэунэтIащ жыджэру иджыпсту унэщIэхэр щаухуэ «Ипщэ» хьэблэщIэр псыкIэ ирикъуу къызэгъэпэщыным.

Абы къыдэкIуэу, лэжьакIуэхэм къапэщылъщ къалэ кIуэцIми жьы хъуа бжьамийхэр щызэрахъуэкIыну, къыщагъэщIэрэщIэжыну. Псалъэм къыдэкIуэу, къэрал мылъкум къыхэкI ахъшэкIэ Лениным и цIэр зезыхьэ, Советскэ уэрамхэм я бжьамийхэр, километри 6-м щIигъу зи кIыхьагъхэр, зыхуей хуагъэзэнущ. Лэжьыгъэхэр IыхьитIу гуэшауэ щытынущ икIи нэсу ахэр щызэфIэкIынур 2026 гъэрщ.