Дэ къытхуатх
Ди газетым и щIэджыкIакIуэ ныбжьыщIэ, «Журналист ныбжьыщIэхэм я школым» и гъэсэн Хъыжьрокъуэ Азэмэт редакцэм къигъэхьа тхыгъэр теухуащ щIэблэм я унэтIакIуэ, егъэджакIуэ Къаныкъуэ Земфирэ.
«Зи гугъу фхуэсщIыну егъэджакIуэр Бахъсэн районым хыхьэ Дыгулыбгъуей къуажэм КIуэкIуэ Валерэ и цIэр зэрихьэу дэт курыт школ №8-м щолажьэ. Ар зэрысцIыхурэ илъэс куэд дэкIами, нобэ хуэдэу сощIэж етхуанэ классым щIэс ныбжьыщIэхэм ди деж ар къыщыщIыхьар.
Дерсыр щIидзэным дыпэплъэу зэклассэгъухэр пэшым дыщIэсу къыщIыхьащ цIыхубз дахэ. Сэлам гуапэ къыдихри, егъэджакIуэ щыпкъэр ди пащхьэм къиуват. Къаныкъуэхэ я нысэ, Тишкэхэ япхъу Земфирэт ар. КъызэрыджаIамкIэ, къыкIэлъыкIуэ илъэсхэм ди класс унафэщIу щытынур арат. Апхуэдэуи урысыбзэмрэ литературэмрэ дэзыгъэджынури Земфирэт.
Абдеж щыщIэздзэри, ебланэ классыр къэзухыу Москва сыкIуэху, а егъэджакIуэр, си анэм хуэдэу, къысщхьэщытащ, сыт щыгъуи си Iуэхухэр къыздиIыгъыу, гъэсэныгъэ екIурэ щIэныгъэ куурэ зэзгъэгъуэтыным нэгъэсауэ сыхуиунэтIу. Нобэр къыздэсым зэхэтхакъым Земфирэ зыгуэрым псалъэ мыхъумыщIэ ирипэсауэ, егуэуауэ, и макъ дришейуэ епсэлъауэ. Ар сыт щыгъуи зэпIэзэрыту, Iэдэбагъ хэлъу, IущагъкIэ ябгъэдэтащ иригъаджэхэм, езыр лъэныкъуэ куэдкIэ абыхэм щапхъэ яхуэхъуу. Къаныкъуэ Земфирэ и хьэл дахэм иджыри зихъуэжакъэм: лэжьыгъэ IэнатIэм щыпэрыувагъащIэм хуэдэу, нэмысышхуэ зыхэлъщ, шыIэныгъэрэ зэхэщIыкI куурэ зиIэщ, зи къалэнхэр къызыхуэтыншэу зэфIэзыхщ. А псоми, шэч хэмылъу, я лъабжьэр, щIэныгъэ куум нэмыщI, Къаныкъуэм и IэщIагъэм, иригъаджэ сабийхэм яхуиIэ лъагъуныгъэращ. Земфирэ иригъэджахэу е зыцIыхухэм яхэмытми ярейщ ар фIыуэ зымылъагъу, пщIэшхуэ хуэзымыщI, и цIэр фIыкIэ къизымыIуэ.
Къаныкъуэ Земфирэ сэри псалъэ дахэкIэ зыхуэзгъэзэну сыхуейщ: «Уузыншэу, бэIутIэIуншэу, гуфIэгъуэ ущымыщIэу, фIыуэ плъагъу уи IэщIагъэм и хъерым уиIэту Тхьэм куэдрэ ди япэ уригъэт. Си щхьэкIэ фIыуэ узолъагъу, пщIэшхуэ пхузощI, си егъэджакIуэ щыпкъэ».
