ЩIэныгъэмрэ Iэмалхэмрэ щагъэгъуазэ

Лышх узыфэхэмкIэ Ростов къалэм щыIэ щIэныгъэ-къэхутакIуэ IуэхущIапIэм и щIэныгъэлIхэр Кърымым и дохутырхэм доIэпыкъу лышхым хуэкIуэж цIыхухъу узыр зэрагъэхъуж Iэмалхэм IэкIуэлъакIуэ хуэхъунымкIэ.

Лышх узыфэхэмкIэ Ефетов В.М. и цIэр зрихьэу Кърым Республикэм иIэ сымаджэщым и дохутырхэр махуищкIэ щыIащ Ростов къалэм. Абыхэм ирагъэлъэгъуащ радиацэ зыпылъ йодкIэ брахитерапиер зэрырагъэкIуэкIыр.

Мы Iэмалыр япэ дыдэу Урысейм и ипщэ щIыналъэхэм къыщыгъэсэбэпын щIэзыдзар дызытепсэлъыхь IуэхущIапIэрщ, илъэс 15 ипэкIэ. А илъэс бжыгъэм къриубыдэу ростов дохутырхэр Iэрыхуэ хуэхъуащ икIи зэпымычу къагъэсэбэп а лэжьэкIэр. А операцэм папщIэ цIыхухъум сэкIэ хэIэбэркъым, псынщIэу къотэджыж, е екIуэжыркъым. ЗэрыжаIэу, лышхым пэщIэтынымкIэ «дыщэ мардэ» зыфIаща Iэмалхэм ящыщщ.

- Лышх шыкъырым радиацэ гуащIэкIэ уеуэу аращ, кIэщIу жыпIэмэ. Абы и фIыгъэкIэ лышхым къыбгъурылъ лы узыншэм зэран ухуэхъуркъым. ГъутхьэпцIу къежьэу, лышхым хуэкIуэж (рак предстательной железы) а узыфэр тынш дыдэу ягъэхъуж, къызэрыщIэкIымкIэ. зи гугъу тщIы Iэмалым кърым дохутырхэр дяпэкIэ ирилэжьэфынущ икIи а операцэ лIэужьыгъуэр зэрырагъэкIуэкIыну IэмэпсымэхэмкIи къызэрагъэпэщащ я сымаджэщыр, - жеIэ медицинэ щIэныгъэхэмкIэ кандидат, онкоуролог Фаенсон Александр.

Гу лъытапхъэщ: Кърымым апхуэдэ операцэ щащIын хуей хъумэ, ростов щIэныгъэлIхэм я нэIэ щIэтущ ар зэрекIуэкIынур.

Мы лэжьыгъэр къызэрагъэпэщащ «ГъащIэ кIыхь, гъащIэ узыншэ» лъэпкъ Iуэхум ипкъ иткIэ.