Аруан щIыналъэм щызэфIагъэкIахэмрэ къапэщылъхэмрэ

КъБР-м и Iэтащхьэ КIуэкIуэ Казбек лэжьыгъэ IуэхукIэ хуэзащ Аруан щIыналъэ администрацэм и Iэтащхьэ ЛIыжьыкъуэ Хьэзрит. ЗэIущIэм щы­тепсэлъыхьащ дызэрыт илъэ­сым къриубыдэу щIыналъэм игъуэта зыужьыныгъэм, къэ­кIуэну зэманым къапэщылъ лэжьыгъэхэмрэ къалэнхэмрэ. 

Къалэхэр зыхуей хуэгъэ­зэным ехьэлIа федеральнэ проектым къриубыдэу Нарт­къалэ, Псыгуэнсу жылэхэм я цIыху зыгъэпсэхупIэхэр зэпэщ ящIащ. Урысейпсо онлайн-IэIэтым кърикIуа Iуэхугъуэхэр я тегъэщIапIэу, етIанэгъэ къагъэщIэрэщIэнущ Нарткъалэ Лениным и цIэр зезыхьэ уэрамым хиубыдэ утыкушхуэр. Къи­нэмыщIауэ, Аруан, Старэ Шэ­рэдж къуажэхэм я дыхьэпIэхэр зэпэщ ящIынущ. 
Лэжьыгъэшхуэ щокIуэкI Къэхъун къуажэми. Абы щызэра­хъуэкI псы зэрыкIуэ бжьамийхэр. Километри 8,9-рэ зи кIыхьагъ бжьамийхэм ящыщу ягъэтIылъащ километри 6-м щIигъу. Псыкъуийуэ ягъэувыну 68-м щыщу 40-р я пIэм ирагъэзэгъакIэщ. Ухуэныгъэ лэ­жьы­гъэхэр и кIэм ноблагъэ. 
Псы Iуэхум епха апхуэдэ лэжьыгъэхэр етIанэгъэ щы­зэ­фIахынущ Нарткъалэрэ Мэр­зэхъурэ. Нарткъалэ а лэжьыгъэ­хэм ящIыгъуу гъуэгухэри зэпэщ щащIынущ. 
Аруан щIыналъэм мы илъэ­сым къриубыдэу щызэфIаха Iуэхугъуэ инхэм ящыщщ сабий 400 зэкIуалIэ хъуну курыт еджапIэщIэ фокIадэм и 1-м ирихьэлIэу абы къызэрыщызэIуахар. «Егъэджэныгъэ» лъэпкъ проектым къыщыгъэлъэгъуа Iуэхугъуэхэр лъабжьэ зыхуэ­хъуа а ухуэныгъэшхуэр и щапхъэ наIуэщ щIыналъэ егъэ­джэныгъэ IэнатIэм лъэбакъуэ­щIэ зэричам. А социальнэ унэтIыныгъэм щIыпIэм зыщиужь зэпытщ. Абы къыщызэIуах сабий гъэсапIэщIэхэр, щыIэхэр зэрагъэпэщыж. Апхуэдэу Старэ Шэрэдж къуажэм сабии 100 зыщIэхуэн гъэсапIэщIэм и у­хуэ­ныгъэр щаублащ. ЗэрыхуагъэфащэмкIэ, абы и бжэхэр цIыкIу­хэм къахузэIуихынущ 2027 гъэм и дыгъэгъазэм. 
Узыншагъэр хъумэным ехьэ­лIа IэнатIэм утепсэлъыхьмэ, я ухуэныгъэхэр зэфIэкIащ икIи къызэIуахащ Старэ Шэрэджрэ Шэрэдж Ищхъэрэмрэ я амбулаторэхэр. А медицинэ IуэхущIапIэхэр нэсу къызэгъэпэщащ зыхуеину унэлъащIэхэмкIэ, техникэмкIэ. Апхуэдэ амбулаторэ етIанэгъэ щаухуэнущ Псыкуэд къуажэми. А лэжьыгъэхэм «Узыншагъэ» лъэпкъ проектым къыщыгъэлъэгъуа Iуэхугъуэхэр я лъабжьэщ. 
УщымыгуфIыкIыу къанэркъым Аруан район библиотекэм игъуэт зыужьыныгъэми. Зыхэта къэралпсо зэпеуэм кърикIуа Iуэхугъуэхэм япкъ иткIэ, IуэхущIапIэм къыIэрыхьэнущ сом мелуан 15 хуэдиз хъу мылъку. Ар трагъэкIуэдэнущ иджырей мардэхэм хуэкIуэ, бжыгъэр зи лъабжьэ технологиехэр зи тегъэщIапIэ, зэпсэлъапIэхэр, зэ­хуэсыпIэхэр зыхэт библиоте­кэ щIыналъэм и къалащхьэм 2026 гъэм къыщызэгъэпэщы­ным.