Хабзэм тету лэжьапIэ гъэувыныр

Къэбэрдей-Балъкъэрым Лэжьыгъэмрэ цIыхухэм социальнэ и лъэныкъуэкIэ къащхьэщыжынымкIэ и министерствэм къызэритамкIэ, республикэм IэнатIэ къэзылъыхъуэхэмрэ лэжьакIуэ хуэныкъуэ IуэхущIапIэхэмрэ ехьэлIауэ Iуэхум фIы и лъэныкъуэкIэ зихъуэжащ. ЖыпIэнурамэ, дызэрыт илъэсым щэкIуэгъуэм и пэщIэдзэхэм ирихьэлIэу лэжьапIэншэхэм я бжыгъэм хэщIащ, IэнатIэ зэпэубыдари нэхъ мащIэ хъуащ.

КъБР-м цIыхухэм IэнатIэ къахуэзыгъуэт и къулыкъухэм лэжьапIэншэу щытхахэм я бжыгъэр мин 1,9-м нэсу ехащ, нэгъабэ щыIа мини 2,7-м елъытауэ. Апхуэдэуи, IуэхущIапIэхэр зыхуэныкъуэ IэщIагъэлIхэм е лэжьакIуэхэм щхьэкIэ абы хущIэкъу цIыхухэм я бжыгъэми кIэрыху зэпытщ. Ар и щыхьэтщ лэжьыгъэ къэбгъуэтыну нэхъ тынш зэрыхъуам.

Псалъэм къыдэкIуэу, республикэм и IуэхущIапIэхэм лэжьакIуэ мини 7,2-рэ къалъыхъуэу центрхэм лъэIухэр щIалъхьауэ щIэлъщ. Дызэрыт илъэсым зэрыщIидзэри, лэжьапIэншэу зезыгъэтхахэм ящыщу 1347-м IэнатIэхэр къыхуагъуэтащ.

Апхуэдэуи министерствэм Iуэху пыухыкIахэр ирегъэкIуэкI, щыIэ хабзэхэр къызэпауду, зэгурыIуэныгъэхэр ямыIэу IэнатIэ Iутхэмрэ налогхэххэм я деж зыщезымыгъэтхахэмрэ къыщIэгъэщыным, ахэр хабзэм тету лэжьапIэ гъэувыным хуэунэтIауэ.

Иджыблагъэ а Iуэхум теухуа зэIущIэ иригъэкIуэкIащ КъБР-м и Правительствэм и УнафэщIым и япэ къуэдзэ Къуныжь МуIэед. КъБР-м лэжьыгъэмрэ цIыхухэм социальнэ и лъэныкъуэкIэ къащхьэщыжынымкIэ и министр Тогузаев ТIэхьир абы щытепсэлъыхьащ и унафэ щIэт IэнатIэм дызэрыт илъэсым и мазибгъум иригъэкIуэкIа лэжьыгъэхэм.

ЗэIущIэм къыщыхэщащ 2025 гъэм жэпуэгъуэм и 1-м ирихьэлIэу лэжьыгъэ зэгурыIуэныгъэхэр зимыIэ, налог хэзых IэнатIэхэм щамытха цIыхухэмрэ IуэхущIапIэхэмрэ я бжыгъэр 6046-рэ зэрыхъуар. ИужькIэ, абыхэм ящыщу 5739-р щыIэ хабзэхэм хуагъэкIуэжащ. Апхуэду, цIыху 398-м лэжьыгъэ зэгурыIуэныгъэхэр IуэхущIапIэхэм иращIылIащ, налог хэзых IэнатIэхэм зыщрагъэтхащ уней IуэхущIапIэу 2804-м, я щхьэ хуэлэжьэжыну 2534-м, мэкъумэш IуэхущIапIэу 1-м. 

Министерствэм иригъэкIуэкI Iуэхухэм ехьэлIауэ КъБР-м и муниципалитетхэм щыIэ лэжьакIуэ гупхэм я зэфIагъэкIыр къызэралъытэ рейтингыщIэм къызэригъэлъэгъуамкIэ, Май, Лэскэн, Iуащхьэмахуэ районхэм япэ увыпIищыр яубыдащ.