Депутатым хуэзащ

КъБР-м и Iэтащхьэ КIуэкIуэ Казбек лэжьыгъэ IуэхукIэ ­хуэзащ «Урысей зэкъуэт» партым къыбгъэдэкIыу УФ-м и Къэрал Думэм и депутат Родинэ Викторие.

ЗэIущIэм щытепсэлъыхьащ Къэбэрдей-Балъкъэрым социальнэ политикэр зэрыщагъэзащIэм, апхуэдэуи цIыхухэм зэрызыкъыхуагъазэм теухуауэ зэгъусэу ирагъэкIуэкI лэ­жьыгъэм. Нэхъ зэпкърыхауэ къытеувыIащ депутатыр ипэ ­махуэм зауэлI хэкIуэдахэм я анэхэм зэрахуэзам. 
Дзэ Iуэху хэхам хэтхэр, абы и ветеранхэр, абыхэм я унагъуэхэр дэIыгъыным теухуа Iуэхухэми гулъытэ хэха хуащIащ. «Хэкум и хъумакIуэхэр» фондым Донецк ЦIыхубэ Республикэм щиIэ ­къудамэм иригъэкIуэкI «Сэлам, Урысей» проектыр гъэзэ­щIэнымкIэ депутатыр дэIэпыкъуэгъушхуэ мэхъу. Дзэ Iуэху хэхам и ветеранхэу Урысейм и щIыналъэ псоми щыпсэухэр къэралым и къалэ куэдым щыIащ, абыхэм я щэнхабзэм, хэкупсэ щIэиным зыщагъэгъуазэу, езыхэм я хэгъэгухэм я лIы­хъужьыгъэ тхыдэр хэгъэрейхэм хуаIуатэу.
Родинэ Викторие а проектым хишащ ди ветеранхэри, абыхэм ящыщ зы, урысей лIыкIуэхэм яхэту, Кубэм щыIащ. Иджыпсту дзэ Iуэху хэхам и ветеранхэм ящыщу ди щIалиплI, «Хэкум и хъумакIуэхэр» республикэ фондым и лэжьакIуэхэри яхэту, Амур областым и Благовещенск къалэм щыIэщ. Ахэр хэтщ ­хэкупсэ форум иным, тхыдэ щIыпIэхэр зрагъэлъагъу, еджа­кIуэхэмрэ студентхэмрэ яхуозэ, я зауэ гъуэгуанэм теухуа хъыбархэр абыхэм жраIэж.
Республикэм и Iэтащхьэм Родинэ Викторие фIыщIэ хуищIащ жылагъуэ жэрдэмхэр къызэрыхилъхьэм, къэралми республикэми хуэщхьэпэн лэжьыгъэхэр жыджэру зэрыригъэкIуэкIым ­папщIэ.