Лэжьыгъэм и ветеранхэр

2025 гъэм и щIышылэм – щэкIуэгъуэм къриубыдэу «Лэжьыгъэм и ветеран» щIыхь зыпылъ дамыгъэхэр иратащ Къэбэрдей-Балъкъэрым и цIыху 391-м, къитащ иджыблагъэ КъБР-м Лэжьыгъэмрэ цIыхухэм социальнэ и лъэныкъуэкIэ къащхьэщыжынымкIэ и министерствэм.

Дызэрыт илъэсым зэрыщIидзэрэ Iуэхум ехьэлIауэ цIыхухэм я дэфтэрхэм хэплъэ комиссэ щхьэхуэр 24-рэ зэхуэсащ икIи а пIалъэм къриубыдэу дэфтэр комплекту 500-м щIигъу щIипщытыкIащ. Мы гъэм иджыри зы зэIущIэ абы иригъэкIуэкIынущ.

Министерствэм зэрыщыжаIамкIэ, «Лэжьыгъэм и ветерану» цIыху мин 37-м нэблагъэ республикэм нобэ щопсэу. Апхуэдэу щыхъукIи, абыхэм ящыщу социальнэ дэIэпыкъуныгъэхэр зратыр, щIыналъэ хабзэм ипкъ иткIэ, цIыху мин 16,2-рщ.

Iуэхур апхуэдэу щIыщытым щхьэусыгъуэ зыбжанэ иIэщ. Псалъэм папщIэ, языныкъуэхэр иджыри пенсэм тIысыжакъым, лъготэхэр хуагъэувын хуэдэу, языныкъуэхэми льготэхэр нэгъуэщI унэтIыныгъэхэмкIэ къыщрат. ЩыIэ къэрал гулъытэхэр ягъуэтын папщIэ, лъэIукIэ закъыхуэзымыгъэзахэр, абыхэм щхьэкIэ зыхуэныкъуэну дэфтэрхэр зэхуэзымыхьэсахэри яхэтщ, къыщыхагъэщащ министерствэм.

ЯдоIэпыкъу

Херсон областым и Голопристанскэ округым хыхьэ Долматовкэ къуажэм и сабий садым иджыблагъэ дэIэпыкъуащ Къэбэрдей-Балъкъэрым и лэжьакIуэ гупыр: фIамыщIкIэ унэр къызэрагъэхуабэ хьэку къутар абыхэм хузэрагъэпэщыжащ.

Ди лэжьакIуэхэм хьэкур зэпкърахри, фIамыщIыр абы къезышалIэ шнекыр кърахащ, ныкъусаныгъэхэр здэщыIэ щIыпIэхэм деж ахэр щызэпагъэвэжащ, жьы щIэхупIи абы хуащIащ, иужькIи автоматикэм падзащ.

«Кадыров Альберт зи пашэ, Къэбэрдей-Балъкъэрым и лэжьакIуэ гупым фIыщIэ ин яхузощI ди хьэкур лажьэу зэрызэтрагъэувэжам щхьэкIэ. Абыхэм я фIыгъэкIэ, сабий цIыкIухэр иджы ди садым къакIуэ хъунущ», - жиIащ абы и унафэщI Запорожец Валентинэ.

Къалэр зэщIагъэдахэ

Мы бжьыхьэм Налшык къалэ администрацэм и лэжьакIуэхэм жыг 700-м щIигъу ди къалащхьэм и уэрамхэмрэ щIыпIэхэмрэ щыхасащ.

Псалъэм папщIэ, «ТекIуэныгъэм и Паркым» пхъэхуейуэ 170-рэ, «ШыкIуртIым алеем» шыкIуртIыму 60-рэ мэз жыг цIыкIуу 400-рэ, къалащхьэм и администрацэм и бжэIупIэм жыг лIэужьыгъуэ зэхуэмыдэу 24-рэ, гъущI гъуэгу вокзалым къедза щIыпIэм пхъэхуейуэ 35-рэ, Къэбэрдей уэрамым бзииху, хьэмкIутIей, нэгъуэщI жыгыу 9, «Илъэсыщэм и паркым» мыIэрысейуэ 6 щыхрагъэубыдащ.

Лэжьыгъэхэр хуэунэтIащ къалэдэсхэм я тыншыпIэр къызэгъэпэщынымрэ къалащхьэм и экологие щытыкIэр егъэфIэкIуэнымрэ, щыжаIащ Налшык къалэ администрацэм, икIи адэкIи абы пащэнущ. ЖыпIэнурамэ, дызыхуэкIуэ илъэсым гъатхэм жыг зэхуэмыдэу 210-м щIигъу къалащхьэм и уэрамхэм иджыри щыхасэнущ.

Къыхэдгъэщынщи, щIым иджы хагъэтIысхьа жыгхэм я нэхъыбэм лъабжьэ лъэщхэр яIэщ, нэхъ псынщIэу ахэр хэкIэн икIи къызэщIэгъэгъэн папщIэ.