Чэнджэщ ират

«Зэхьэзэхуэр зи лъабжьэ экономикэ лъэщ» лъэпкъ пэхуэщIэм ипкъ иткIэ Къэбэрдей-Балъкъэрым и хьэрычэтыщIэу, я щхьэ хуэлэжьэжыну налог хэзых IэнатIэхэм зыщезыгъэтхахэу, физлицоуэ мини 3-м щIигъум Iуэхутхьэбзэ зэхуэмыдэхэр нэгъабэ щыхуащIащ ди щIыналъэм «Си хьэрычэт IэнатIэ» и центрым. 
«2025 гъэм центрым Iуэхутхьэбзэ зэхуэмыдэу 3471-рэ яхуищIащ бизнесым япэ лъэбакъуэхэр хэзычэну мурад зыщIа, хьэрычэт IэнатIэ мыинымрэ курытымрэ хыхьэну IуэхущIапIэу 2981-м, я щхьэ хуэлэжьэжыну зезыгъэтха цIыху 23-м, физлицо 899-м», - къитащ КъБР-м Экономикэ зыужьыныгъэмкIэ и министерствэм.
Фигу къэдгъэкIыжынщи, щIыналъэм «Си хьэрычэт IэнатIэ» и центрым, КъБР-м Экономикэ зыужьыныгъэмкIэ и министерствэр къыдэIэпыкъуу, республикэм и хьэрычэтыщIэхэм чэнджэщ, информацэ, методикэ дэIэпыкъуныгъэхэр ярет, егъэджэныгъэ Iуэхутхьэбзэхэр яхуещIэ. 
Абыхэм ящыщу щIэупщIэ нэхъ зиIэр продукцэхэмрэ Iуэхутхьэбзэхэмрэ цIыху нэхъыбэм егъэцIыхуным, я фIагъым щыхьэт техъуэ сертификатхэр зэгъэпэщыным, бжыгъэ лъабжьэ зиIэ сату щIыпIэхэм ахэр щыщэным, бизнес-планхэр зэхэгъэувэным, гъэлъэгъуэныгъэ зэхуэмыдэхэм хэтыным ехьэлIа чэнджэщхэмрэ хъыбархэмрэщ.
ЖыпIэнурамэ, «Зэхьэзэхуэр зи лъабжьэ экономикэ лъэщ» лъэпкъ пэхуэщIэм ипкъ иткIэ щIыналъэ, дунейпсо гъэлъэгъуэныгъэу 4-м республикэм и хьэрычэтыщIэхэр хэтащ нэгъабэ. Абы нэмыщI, бизнес-миссиеу 4, бизнес зэхуэсу 2, щIыналъэ зэхьэзэхуэу 2 къызэрагъэпэщащ абыхэм папщIэ.