КъБР-м и Iэтащхьэ КIуэкIуэ Казбек Къэбэрдей-Балъкъэр Республикэм и Къэрал саугъэтыр литературэмрэ гъуазджэмкIэ, щIэныгъэмрэ техникэмкIэ, апхуэдэуи Къэбэрдей-Балъкъэр Республикэм и Iэтащхьэм щIэныгъэлI ныбжьыщIэхэм папщIэ игъэува саугъэтыр щIэныгъэ IэнатIэм зыщыхуагъэфэщахэм я дамыгъэ, цIэ лъапIэхэр яритыжащ.
Саугъэтхэр хуагъэфэщащ щэнхабзэмрэ гъуазджэмрэ я лэжьакIуэхэу литературэмрэ гъуазджэмрэ я IэнатIэхэм хэлъхьэныгъэшхуэ хуэхъуа IэдакъэщIэкIхэр зиIэхэм, щIэныгъэ къэхутэныгъэ къызэрымыкIуэхэр езыгъэкIуэкIа щIэныгъэ лэжьакIуэхэм.
ГуфIэгъуэ зэхуэсым хэтащ КъБР-м и Парламентым и УнафэщI Егоровэ Татьянэ, КъБР-м и Правительствэм и УнафэщI Мусуков Алий, КъБР-м и Iэтащхьэм и Администрацэм и УнафэщI Къуэдзокъуэ Мухьэмэд, КъБР-м щыIэ федеральнэ инспектор нэхъыщхьэ Васильченкэ Дмитрий, министерствэхэмрэ IуэхущIапIэхэм я Iэтащхьэхэр.
КIуэкIуэ Казбек щэнхабзэмрэ гъуазджэмрэ, щIэныгъэ IэнатIэм я лэжьакIуэхэм ехъуэхъуащ икIи къыхигъэщащ абыхэм я творческэ, псэкупсэ, узэщIакIуэ къалэнхэр хьэлэлу зэрагъэзащIэм Къэбэрдей-Балъкъэрым зегъэужьынымкIэ, щIэблэр гъэсэнымкIэ мыхьэнэшхуэ зэриIэр.
Къызэхуэсахэм защыхуигъазэм республикэм и Iэтащхьэм жиIащ:
- Фыздынэсыфахэр, шэч хэмылъу, кърикIуащ фегугъуу, фи къару фемыблэжу фызэрылэжьам, ауэ гурыIуэгъуэщ уи IэщIагъэр фIыуэ плъагъумэ, абы ухуэпэжмэ, уи мурадхэм уалъэIэсын папщIэ узыхуеину псори бгъуэтмэ, апхуэдэ ехъулIэныгъэхэр къызэрыпхуэхьынур. Дэ адэкIи сыт и лъэныкъуэкIи дэтIыгъынущ щIэныгъэ IэнатIэр, ди щIэныгъэлIхэмрэ IэщIагъэлIхэмрэ зыхуеинухэмкIэ къызэдгъэпэщынущ, я зэчийр нэсу къызыкъуахыфын папщIэ. Мыбдежым къыщылъытапхъэщ щIэныгъэмрэ ар здынэс лъагапIэхэмрэ ди къэралышхуэ Урысейм, ди Къэбэрдей-Балъкъэрым я къэкIуэнум и тегъэщIапIэу зэрыщытыр. Абыхэм елъытащ ди зыужьыныгъэр, цIыхухэм я псэукIэр егъэфIэкIуэнми къалэнышхуэ щагъэзащIэ. Ди Президент Путин Владимир Владимир и къуэм дэ къалэну къытхуигъэуващ зэман гъунэгъум Урысейм технологие и лъэныкъуэкIэ бжьыпэр иубыдын хуейуэ икIи дэ абы дыкъимыкIуэту дыхущIэкъун хуейщ, мыхьэнэшхуэ зиIэ а пщэрылъыр гъэзэщIа хъуным ди щIэныгъэлIхэри жыджэру хэтыну дащогугъ. Сынывохъуэхъу нобэрей саугъэтхэр фи лэжьыгъэм и лъагапIэ нэхъ ин дыдэ мыхъуу, атIэ ахэр ехъулIэныгъэщIэхэм фахуэзышэн зы дэкIуеипIэу къыфхущIэкIыну, дыщалъхуа республикэмрэ къэралымрэ щыпсэухэм фи лэжьыгъэмкIэ къахуэфхь сэбэпынагъыр фи зэфIэкIхэм я инагъыр къызэрыфлъытэ пщалъэ нэхъыщхьэ дыдэу щытыну.
Къэбэрдей-Балъкъэр Республикэм и Iэтащхьэм и УказкIэ къэрал саугъэтхэр литературэмрэ гъуазджэмрэ я IэнатIэхэм щыхуагъэфэщащ «ЛIэщIыгъуэм и цIыху цIэрыIуэу щэ» документальнэ фильмхэм я сценарийр зытхахэу Елъкъан Маринэ, Жабоевэ Iэсият, Къэзанш Людмилэ, продюсер Хьэмжу Ларисэ сымэ;
литературэджхэу Къуэныкъуей Мадинэрэ Къаскъул Зитэрэ - «Къэбэрдей литературэм и классикэ тхэкIэр зэрызэфIэувамрэ абы зэрызиужьамрэ» тхылъыр зэрагъэхьэзырам папщIэ;
филологхэу Кучуковэ Зухрарэ Тетуев Борисрэ, тхакIуэ-документалист Темукуев Борис - Къэбэрдей-Балъкъэр АССР-м и цIыхубэ усакIуэ Кулиев Къайсын и тхыгъэ псори щызэхуэхьэса тхылъхэр къыдэкIыным зэрыхуагъэхьэзырам папщIэ;
сурэтыщI СэвкIуий Хьэмид - «Хьэжы-Мурат», «Къэзакъхэр» повестхэм яхуищIа графикэ сурэтхэм папщIэ.
ЩIэныгъэмрэ техникэмрэ я IэнатIэхэм я лэжьакIуэхэм ящыщу Къэбэрдей-Балъкъэр Республикэм и Къэрал саугъэтхэр иратащ, абы и лауреат цIэ лъапIэр фIащащ тхыдэ щIэныгъэхэмкIэ доктор, РАН-м и КъБЩIЦ-м Гуманитар къэхутэныгъэхэмкIэ и институтым и щIэныгъэ лэжьакIуэ пажэ Абазэ Алексей, тхыдэ щIэныгъэхэмкIэ доктор, РАН-м и КъБЩIЦ-м и щIэныгъэ-инновацэ центрым и унафэщI Къущхьэбий Анзор - «Адыгэхэр: Адыгейхэр. Къэбэрдейхэр. Шэрджэсхэр. Шапсыгъхэр» монографиер зэрагъэхьэзырам папщIэ;
биологие щIэныгъэхэмкIэ доктор, профессор, ЩIэныгъэхэмкIэ Дунейпсо Адыгэ академием и щIэныгъэ секретарь нэхъыщхьэ Щхьэгъэпсо Сэфарбий - «Къэбэрдей-Балъкъэрым узыщрихьэлIэ къэкIыгъэхэр: зэрызэхэлъ щIыкIэр, я лIэужьыгъуэхэр, экологиер, ахэр хъумэныр, зэгъэзэхуауэ къэгъэсэбэпыныр» монографие лэжьыгъэхэм папщIэ;
Бгы лъагэ геофизикэ институтым и щIэныгъэ лэжьакIуэ нэхъыщIэ Къурашэ Оксанэ - ЩIым теухуа щIэныгъэм зегъэужьыным хэлъхьэныгъэшхуэ хуэхъуа къэхутэныгъэхэр зэрыригъэкIуэкIам папщIэ;
Бэрбэч Хь. М. и цIэр зезыхьэ КъБКъУ-м неорганическэ икIи физическэ химиемкIэ и кафедрэм и ассистент Хъуэт Астемыр - пщтырагъ гуащIэхэр зэран зыхуэмыхъу химие пкъыгъуэхэр къэгупсысыным хуэунэтIауэ иригъэкIуэкIа къэхутэныгъэхэм кърикIуахэм папщIэ;
Бгы лъагэ геофизикэ институтым и щIэныгъэ лэжьакIуэ нэхъыщIэ Шэру Марьянэ - ЩIым теухуа щIэныгъэм зегъэужьыным хэлъхьэныгъэшхуэ хуэхъуа къэхутэныгъэхэр зэрыригъэкIуэкIам папщIэ.
