ЦIыху гуащIафIэм, щхьэх зымыщIэм и Iэпкълъэпкъым сэкъат иIэми увыIэнукъым, сэбэп зэрыхъун Iэмал сытым дежи къилъыхъуэнущ. Псэ къабзагъэрэ гу щабагърэ зыхэлъыр сытми пэлъэщыфыну уи фIэщ ещI апхуэдэхэм.
Зи гугъу фхуэсщIыну Хьэту Астемыр Налшык къалэ къыщалъхуащ, курыт еджапIэ нэужьым «Центр реабилитации инвалидов и лиц с органиченными возможностями здоровья» еджапIэр ЕсэнтIыгу къыщиухащ, «делопроизводитель и юрист» IэщIагъэр иIэу. Журналист ныбжьыщIэхэм я дерсхэр Налшык къыщиухащ. И узыншагъэм сэкъат иIэми, щхьэх жыхуэпIэр имыщIэу жылагъуэ Iуэхухэм жыджэру хэтщ, и гуащIэ хелъхьэ мы щIалэщIэм.
Астемыр къызжиIахэм сыхуейт фыщызгъэгъуэзэну:
- Мы дунеишхуэм цIыхум нэхърэ нэхъ лъапIэ тету къыщIэкIынкъым. Гугъуехь пэщIэхуам уигурэ уи псэрэ къыбгъэдэкIыу зыщIэбгъэкъуэныр, абы удэIэпыкъуныр псапэщ икIи гуапагъэщ. Си Iэпкълъэпкъым сэкъат иIэу сыкъалъхуами, зыгуэр къызгурыIуэ зэрыхъурэ, дуней дыкъэзыухъуреихьым тету хъуар фIыуэ солъагъу, псэ зыIути-зыIумыти фIы зэрахуэсщIэным, си къарум къызэрихькIэ сазэрыдэIэпыкъуным сыхущIокъу. «Рука помощи КБР» къызэзгъэпэщащ, си Iуэхухэр къыздэзыIыгъхэм я гъусэу. ДэIэпыкъуэгъу хуэныкъуэ цIыхухэм теухуауэ хъыбар къытIэрагъэхьэмэ, интернетым и IэмалхэмкIэ хэIущIыIу дощI. «Зэхэшэ шэбэщ» жыхуиIэращи, зэрытхузэфIэкIкIэ цIыхум защIыдогъакъуэ.
КъинэмыщIауэ сыхэтщ, Хэкум и хъумакIуэхэм я унагъуэхэм я жылагъуэ зэгухьэныгъэм Къэбэрдей-Балъкъэрым щиIэ къудамэм и унафэщI Алимэ Аллэ зи пашэ гупым. Абыи схузэфIэкI щызощIэ. Дэ махуэ къэс долажьэ, щэбэтымрэ тхьэмахуэмрэ къищынэмыщIа. Налшык ди хэщIапIэр здэщыIэр Лениным и уэрамым тет унэ №53-рщ. Нарткъалэ - Ахъмэтым и цIэр зезыхьэ уэрамым тет унэ №20-м. Мыбы щытхухаха пэшыр Аруан щIыналъэ администрацэм и тхьэмадэ ЛIыжьыкъуэ Хьэзрит къыдитащ.
Iуэхум си гуащIэ хэслъхьащэрэт жызыIэ дэтхэнэ цIыхуми, зыхуэкъулей хьэпшыпхэр кърахьэлIэ, кърашалIэ. Дэ ахэр зыдогъэзахуэ. Ди лIыхъужьхэр зыхуэныкъуэ хьэпшыпхэр Аллэ зрегъащIэри, зауэ губгъуэм ит ди щIалэхэм яхуешэ. Гупым хэтхэр зэрытхузэфIэкIкIэ абы дыдоIэпыкъу. Псапэ тщIарэт жызыIэу къытхыхьэхэри мащIэкъым.
Дзэ Iуэху хэхам хэтхэм, абы зи щхьэ хэзылъхьахэм я унагъуэхэм ди юристхэр ядоIэпыкъу пщIэншэу. Тхьэмахуэм хуэзэу зы махуэ хэтхауэ дэIэпыкъуэгъу хуэныкъуэхэр абыхэм я деж къокIуалIэ.
ЦIыхур хуеймэ, хуэмыщIэн щыIэкъым. Мывэр зэпах, пхъэр зэгуах, гъущIыр зэпагъавэ. Сытым щыгъуи фIым ухущIэкъун хуейщ. ЦIыху дыджу дунейм утет хъунукъым. «ЦIыхур-цIыху щIыжщ», жаIащ пасэм псэуахэм. Дызэхуэгуапэмэ, дызэхуэгумащIэмэ, зэныбжьэгъугъэ дяку дэлъмэ, псори дызэгурыIуэ-дызэдэIуэжу дыпсэуфынущ.
Си щхьэкIэ сыкъапщтэмэ, хъуэпсапIэу сиIэр ди мамыр гъащIэм папщIэ мафIэ лыгъейм хэт ди щIалэхэр хэщI щымыIэу я Iыхьлыхэм къахуэкIуэжынырщ.
«Адыгэ псалъэм» мыри дыщIызгъунут: сыкъеджэф зэрыхъурэ а газетыр къысхуокIуэ. Итхэм сыдихьэхыу соджэ, адыгэ лъэпкъым сызэрыщыщым срипэгэну, сригушхуэну куэд къытыводзэри, сыхуейт фефIэкIуэну, «Адыгэ псалъэм» еджэхэм къахэхъуэну.
