Дызэрыщыгъуазэщи, фокIадэм и 8-м ди къэралым щагъэлъэпIащ Урысей Федерацэм и лъэпкъхэм я бзэхэр хъумэным и махуэр.
Мыр къызэрырахьэжьэрэ куэд щIакъым - 2025 гъэм щэкIуэгъуэм и 4-м УФ-м и Президент Путин Владимир абы теухуа унафэм Iэ щIидза иужькIэщ.
Мы Iуэхум и мыхьэнэр инщ, зыхуэгъэзар ижь-ижьыж лъандэрэ цIыхухэр зыгъэпIейтейщ. ФокIадэм и 8-м щIытрагъэхуар Совет Союзым и усакIуэ гъуэзэджэ Гамзатов Расул къыщалъхуа махуэти аращ. Мы цIыху щэджащэр урысыбзэкIи аварыбзэкIи тхэуэ щытащ. Абы зэгуэр жиIэгъат: «Сэ урысыбзэкIэ сыпсалъэми, авар лъэпкъым сыкъызэрыхэкIар згъэгъуащэркъым. Си бзэр - си псэщ!»
Нобэрей гъащIэм дэ щыхьэт дытохъуэ бзэ нэхъыбэ зэгъэщIэным пщIэ лей зэрыхуащIми, къулеягъэ нэсу ар зэрыщытми.
Зи гугъу тщIы махуэшхуэм теухуа зэхуэс щрагъэкIуэкIащ Пушкин Александр и фэеплъым деж, республикэм и къалащхьэм дэтым.
Зэхыхьэр къызэрагъэпэщащ урыс усакIуэ щэджащэм и цIэр зезыхьэу Налшык къалэ щыIэ курыт еджапIэ №5-м и егъэджакIуэхэу Iэхъуэбэч Iэсият, Iэбыдэ Раметэ, Гаевэ Тамарэ, Гъут Iэсият, Къэгъэзэж Оксанэ сымэ.
Абыхэм я гъэсэн цIыкIухэу етхуанэ, еханэ, ебгъуанэ классхэм щIэсхэр Пушкин Александрэ Гамзатов Расулрэ я усэхэм гъэхуауэ къеджащ.
ЗэIущIэм хэтащ республикэм ис лъэпкъхэм къахэкIа усакIуэхэр, тхакIуэхэр, гъуазджэм и лэжьакIуэхэр, журналистхэр.
«Заман» газетым и къудамэм и редактор, балъкъэр усакIуэ, тхакIуэ Османов Хьисэ къыщыпсалъэм къыхигъэщащ:
- Пушкин Александр къызэрылъытапхъэр урыс усыгъэм и дыгъэ-мазэущ. ЦIыху гу къабзэм и псэм дахагъэ куэд къыщоуш. Пэжыр зи гъуазэ усакIуэшхуэм и IэдакъэщIэкIхэр зэманым ипхъэхкъым. Сыту жытIэмэ, ар и нэхъыбэм зытетхыхьари зытеусыхьари лъагъуныгъэрщ, цIыхугъэрщ, псэ къабзагъэрщ, хуитыныгъэрщ, дыкъэзыухъуреихь дунейм и дахагъэрщ. Дэ, нэхъыжьхэми нобэрей ди щIэблэми, гъащIэм дызэрыхущытыпхъэ-дызэрыбгъэдыхьэпхъэм хуэгъэзауэ щапхъэ къызыхэтхыфын куэд нобэр къыздэсми къыхэдгъуэтэнущ Пушкин Александр и IэдакъэщIэкIхэм, - жиIащ абы.
Пушкин Александррэ Гамзатов Расулрэ я IэдакъэщIэкIхэм, я дуней тетыкIам, я гъащIэм теухуауэ зэIущIэм къыщыпсэлъащ Къэбэрдей-Балъкъэрым и ТхакIуэхэм я зэгухьэныгъэм хэтхэу Сарбашев Азнаур, Уэтэбей Руслан, Абаевэ Сакинат сымэ. Ахэр къеджащ усакIуэшхуэхэм я IэрыкIхэм, абыхэм ятеухуауэ езыхэм зэхалъхьа усэхэм.
