Гъатхэпэм и 3, бэрэжьей
♦ТхакIуэм и дунейпсо махуэщ
♦ЩIыуэпс къабзэм и дунейпсо махуэщ
♦Сабийхэм яхуэгъэза нэтынхэр зыгъэхьэзыр телевиденэмрэ радиомрэ я дунейпсо махуэщ
♦ТхьэкIумэм и узыншагъэм кIэлъыплъыным и дунейпсо махуэщ
♦Куржым щагъэлъапIэ Анэм и махуэр
♦Къыргъызым и Къэрал ныпым и махуэщ
♦Болгарием и лъэпкъ гуфIэгъуэщ - уэсмэнхэм я пщылIыгъэм къыщыщIэкIа, езыхэм я къэралыгъуэр щызэрагъэпэщыжа махуэщ. 1396 гъэм къыщыщIэдзауэ 1878 гъэ пщIондэ Болгариер Уэсмэн империем хыхьэу щытащ.
♦Японием щагъэлъапIэ хъыджэбз цIыкIухэм я махуэр
♦1613 гъэм Романов Михаил Фёдор и къуэр Урысейм и пащтыхьу щыхахащ цIыхубэ лIыкIуэхэм я зэхуэс нэхъыщхьэм.
♦1861 гъэм Урысейм и император Александр ЕтIуанэм Iэ щIидзащ цIыхухэр ягъэпщылIу мыдэным теухуа, хуит къэхъуж мэкъумэшыщIэхэм я Iуэхур зэрыхъунур щыубзыхуа унафэм.
♦1863 гъэм США-м ЩIэныгъэхэмкIэ и лъэпкъ академиер къызэрагъэпэщащ.
♦1920 гъэм Москва Печатым и унэ къыщызэIуахащ. Иджыпсту ар Журналистым и Унэ нэхъыщхьэрщ.
♦1923 гъэм Америкэм къыщыдэкIащ «Time» журналым и япэ номерыр.
♦1931 гъэм США-м и Конгрессым къэралым и лъэпкъ гимныр къищтащ.
♦1991 гъэм Латвиемрэ Эстониемрэ референдум щекIуэкIащ СССР-м къыхэкIыным теухуауэ. Латвием щыпсэухэм я процент 75-м нэблагъэр, Эстонием исхэм я процент 78-м щIигъур и телъхьэ хъуат я къэралхэр щхьэхуэ хъуным.
♦1847 гъэм къалъхуащ Шотландием щыщ щIэныгъэлI, къэхутакIуэ, телефоныр къэзыгупсыса, Америкэм телекоммуникацэ IэнатIэм зыщиужьыным хэлъхьэныгъэшхуэ хуэзыщIа Белл Грейам Александр.
♦1899 гъэм къалъхуащ совет тхакIуэ, усакIуэ, драматург Олешэ Юрий.
♦1921 гъэм къалъхуащ философие щIэныгъэхэм я доктор, Адыгэ Республикэм щIэныгъэмкIэ щIыхь зиIэ и лэжьакIуэ, Адыгейм и къэрал педагогикэ институтым и ректору щыта Ячиков Александр.
♦1921 гъэм къалъхуащ Къэрэшей-Шэрджэсым щыщ къэрал, политикэ лэжьакIуэ, щIэныгъэлI Къардэн Зэмахъшэрий.
♦1925 гъэм къалъхуащ совет актрисэ, УФ-м и цIыхубэ артисткэ Марковэ Риммэ.
♦1930 гъэм къалъхуащ адыгэ усакIуэ, драматург Мысачэ Пётр.
♦1938 гъэм къалъхуащ кинорежиссёр, тхакIуэ, композитор, продюсер, ЩIДАА-м и академик Къандур Мухьэдин.
♦1940 гъэм къалъхуащ совет актёр, УФ-м и цIыхубэ артист Мартынюк Георгий.
♦1952 гъэм къалъхуащ КъБР-м щIыхь зиIэ и артист Молей Алихъан.
♦1966 гъэм къалъхуащ урысей къэрал къулыкъущIэ, политик, УФ-м и Правительствэм и УнафэщI Мишустин Михаил.
Дунейм и щытыкIэнур
«pogoda.yandex.ru» сайтым зэритымкIэ, Налшык уфауэ щыщытынущ, пIалъэ-пIалъэкIэрэ уэс къыщесынущ. Махуэм хуабэр градуси 2 - 3, жэщым щIыIэр 1 градус щыхъунущ.
Гъатхэпэм и 4, махуэку
♦Белоруссием и милицэм и махуэщ
♦Франджым щагъэлъапIэ анэшхуэхэм я махуэр
♦Китайм щагъэлъапIэ жыг хэсэным и махуэр
♦1726 гъэм Урысейм щыяпэу Петербург гимназие къыщызэIуахащ. Ар ЩIэныгъэхэмкIэ академием егъэщIылIат.
♦1756 гъэм Сенатым и унафэкIэ Москва къэрал университетым типографие къыщызэIуахащ. Иджыпсту ар Ломоносовым и цIэр зезыхьэ МКъУ-м и тхылъ тедзапIэщ.
♦1818 гъэм Москва къыщызэIуахащ Минин Кузьмарэ Пожарский Дмитрийрэ я фэеплъ.
♦1877 гъэм Америкэм щыщ Берлинер Эмиль микрофоныр къигупсысащ.
♦1846 гъэм «Кавказ» газетым къытридзащ Къаз-Джэрий и «Зи щIыхьыр ин къэрал тетым и деж» письмор.
♦1918 гъэм Тэрч ЦIыхубэ Республикэр къэунэхуащ
♦1921 гъэм Абхъазым Совет властыр щагъэуващ икIи Абхъаз республикэ къызэрагъэпэщащ.
♦1955 гъэм Японием и «Sony» фирмэм жыпкIэ къепхьэкI хъу радиохэр къыщIигъэкIыу щIидзащ.
♦1986 гъэм СССР-м ЩэнхабзэмкIэ и министерствэм унафэ къыдигъэкIащ «1941 - 1945 гъэхэм екIуэкIа Хэку зауэшхуэм и Музей нэхъыщхьэ къызэгъэпэщыным теухуауэ». Ар Iэтауэ къызэIуахащ 1995 гъэм накъыгъэм и 9-м - ТекIуэныгъэ Иныр илъэс 50 щрикъу махуэм.
♦2012 гъэм Путин Владимир Урысейм и Президенту хахыжащ, Iэ зыIэтахэм я процент 63,6-рэ и телъхьэ хъури. Абы и пэкIи а къулыкъум Путиныр пIалъитIкIэ пэрытат.
♦1678 гъэм къалъхуащ Италием щыщ композитор, дирижёр, скрипкэм Iэзэ дыдэу еуэ Вивальди Антонио.
♦1925 гъэм къалъхуащ франджы композитор цIэрыIуэ Мориа Поль.
♦1937 гъэм къалъхуащ медицинэ щIэныгъэхэм я кандидат, ЗыплъыхьакIуэ къэзыкIухьхэм я урысей зэгухьэныгъэм и президенту щыта, СССР-м и Къэрал саугъэтыр зыхуагъэфэща Сенкевич Юрий.
♦1939 гъэм къалъхуащ совет актрисэ, РСФСР-м и цIыхубэ артисткэ Лужинэ Ларисэ.
♦1940 гъэм къалъхуащ мэкъумэш щIэныгъэхэм я доктор, КъБКъМУ-м и профессор КIуэкIуэ Тэлэдин.
♦1941 гъэм къалъхуащ дирижёр, СССР-м и цIыхубэ артист, Москва и филармонием и Академическэ симфоние оркестрым и унафэщI Симонов Юрий.
♦1942 гъэм къалъхуащ физико-математикэ щIэныгъэхэм я доктор, КъБКъУ-м и профессор Щоджэн Вячеслав.
♦1948 гъэм къалъхуащ радиожурналист, КъБР-м щIыхь зиIэ и журналист Хьэмту Къадир.
♦1949 гъэм къалъхуащ жылагъуэ лэжьакIуэ, публицист, адыгэхэм я тхыдэр джыным хэлъхьэныгъэшхуэ хуэзыщIа, УФ-м щэнхабзэмкIэ щIыхь зиIэ и лэжьакIуэ, ЩIДАА-м и член-корреспондент, КъБР-м и Къэрал саугъэтыр зыхуагъэфэща Котляровэ Марие.
♦1954 гъэм къалъхуащ къэфакIуэ, уэрэджыIакIуэ, УФ-м щIыхь зиIэ и артист Моисеев Борис.
♦1969 гъэм къалъхуащ къэрал лэжьакIуэ, КъБР-м щIыхь зиIэ и юрист, Къэбэрдей-Балъкъэрым экстремизмэмрэ щIалэгъуалэ политикэмрэ пыщIа лэжьыгъэхэр щIыпIэхэм щызэгъэуIунымкIэ и министр Къуэшырокъуэ Залым.
♦1979 гъэм къалъхуащ урысей футболист, гъуащхьэтет, УФ-м спортымкIэ щIыхь зиIэ и мастер Малафеев Вячеслав.
Дунейм и щытыкIэнур
«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Махуэм хуабэр градуси 2 - 4, жэщым щIыIэр градуси 5 - 4 щыхъунущ.
Лъэпкъ Iущыгъэ:
МастэкIэ Iэшэщ, шатэкIэ бзаджэщ.
