Къурш джабэ нэкIумДэфтэрхэм къаIуатэ Дызэрыт лIэщIыгъуэм и 20-нэ гъэхэм Урысейм щIэныгъэм хуэфащэ гулъытэ щыхуащIыртэкъым. Ар зригъэгъуэтыну зи насыпым къихьар хуэщIауэ псэу цIыху зырызхэрт, икIи, курыт лIэщIыгъуэхэм щIэныгъэм чылисэхэр егъэзыпIэ зэрахуэхъуауэ щытам хуэдэу, абы къыпэплъэр Урысей тажзехьэхэм я фIэфIыныгъэкIэ лажьэ академием и чэнджыпIэрт. Эммануэль щIэныгъэхэмкIэ академием хэтхэм захуигъэзат, Кавказ Иным и щыгум ухуэзышэ лъагъуэ шынагъуэншэхэр хишын мураду. Академием Эммануэль и жэрдэмыр иIыгъащ, икIи а зэманым Урысейм и пащтыхьу щыта Николай Езанэм хуит ищIа нэужь, Кавказым къагъэкIуат Урысей щIэныгъэлI цIэрыIуэхэу Ленц Эмилио (Коцебу и гъусэу дуней псор къызэхэзыкIухьауэ щыта, иужькIэ физикэмкIэ зэригъуазэ лэжьыгъэхэр зытхар), физикэ, химие щIэныгъэхэмкIэ профессор Купфер Адольф, Бытырбыху дэт ботаникэ жыг хадэм и унафэщI Мейер Карл, этнолог цIэрыIуэ Менетрие Эдуард сымэ. * * * Къуршыщхьэ уэсылъэхэмкIэ къиIукIырт гур зытхьэкъу макъ зэхуэмыдэхэр. Псатхьэ лъапIэм и уэрэд гуакIуэр – бгы абрагъуэм тепщэгъуэ гъащIэр зыIыгъхэм затригуашэрэ абыхэм я гурыгъу-гурыщIэхэр игъэжабзэу Тхьэ лъапIэм хуэгущIэгъулыуэ щытыным къихуриджэхэу. Абы хэту пшагъуэ нэщхъыфIэхэр уэгум ибзэхыкIащ, къурш уэсылъэхэм я щыгум налкъут-налмэсым хуэдэу уIуплъэ хъуащ, псынэ Iэсэ цIыкIухэр зэщIэушащ, удз епэрхэм, IэфIыгъэкIэ гур ягъэIурыщIэу, акъужь къабзэхэр ягъэнщIырт. Я адэ жьакIэху Псатхьэ лъапIэм и макъыр зэхихакъым. Ищхъэрабгъу лъэныкъуэмкIэ щыплъэм абы къилъэгъуащ жьым зэрихьэу, дыгъэм пэлыду къуршыщхьэм хуэкIуэ зекIуэлIхэр… * * * Iуащхьэмахуэр – ар уэсылъэ къум щIыпIэ абрагъуэщ. Уэри щIыри щызэхэзэрыхьыжа зэманым, хы хьэлэмэтхэмрэ материк телъыджэхэмрэ къыщыунэхуащ, щIы къатиблым къыщIэкIыу дунейм къытехьауэ. ЩIым и гъунэхэм гъащIэ щыIэщ. Iуащхьэмахуэ щыгу зы псэущхьи ущрихьэлIэркъым. Къурш псынэ фIэщыгъэцIэр абы куэдкIэ нэхъ йозэгъ Псэншэ зыфIаща Асфальт гуэлым нэхърэ… * * * …ЦIыхуищыр, пшагъуэм хэкIуэдам ещхьу, бзэхащ, еплIанэм нэхъри лагэу зиIэтырт икIи абы и Iэпкълъэпкъ уардэр Iуащхьэмахуэ и щыгум къыщыхутащ. КъызэрыщIэкIымкIэ, ар адыгэ лъэпкъым къыхэкIа, Налшык къыщалъхуа Хэшыр Чыларт. Абы хэту, уэри щIыри къигъэдаIуэу, фочышэ макъхэр Iуащ. ЛIэщIыгъуэ куэдкIэ щыму къекIуэкIа къурш джэрпэджэжхэр зэщIэушэу хуежьащ. * * * ЗекIуэлIхэр къуршым къехыжа нэужь, Эммануэль санэхуафэ ин зэхиублат. Абы кърихьэлIат Къэбэрдейм, Къэрэшейм, Урысейм, нэгъуэщI щIыпIэхэм щыщхэри, Iэнэм пэрысхэм ирафырт Iуащхьэмахуэ и уэсымкIэ ягъэщта фадэ «ПсынщIэхэр». Япэ фадэбжьэмрэ хъуэхъумрэ хуаIэтащ зи узыншагъэр быдэ хъуну я гуапэ Урысей щIэныгъэм и тепщэныгъэр зыIыгъ тажзехьэ, Император Николай Езанэм. Макъамэ зэрамыIэм къыхэкIыу, хъуэхъум фочышэ макъхэр щIэувэрт. ИужькIэ фадэбжьэр хуаIэтащ генерал Эммануэль, гупым хэта щIэныгъэрылажьэхэм, адыгэлI Хьэшыр Чылар. Хъуэхъу трыжыIыхьырт Iуащхьэмахуэ Урысей пащтыхьыгъуэ и хъугъуэфIыгъуэхэм ящыщ зэрыхъуами… Эммануэль зи пашэ зекIуэм хэтахэр. Хьэшыр Чылар езанэ сатырым и кум хэтщ. (Iуащхьэмахуэ. 1829 гъэ)
Поделиться:
Читать также:
17.05.2024 - 17:18 →
Хэкурщ нэхъапэр
17.05.2024 - 10:01 →
Пасэрей хасэ зэхэшэкIэ
16.05.2024 - 10:12 →
ХэкIыпIэншэу къагъэнат
13.05.2024 - 12:04 →
Кавказым бэнэныгъэр къызэрыщежьар
26.04.2024 - 17:06 →
Тызылыкъуэр пэщIэдзэт
|