ЕджакIуэхэр зэпоуэ

30 мая, 2024 - 13:42
Шахмат
Къэбэрдей-Балъкъэрым и курыт еджапIэхэм шахматымкIэ я командэхэм я республикэ зэхьэзэхуэ Налшык къалэм иджыблагъэ щекIуэкIащ. Абы хэтащ щIыналъэхэм я лIыкIуэхэу гупибгъу.
Удэзыхьэхыу икIи гъэщIэгъуэну екIуэкIа зэхьэзэхуэм кърикIуахэр зэхалъхьэжа нэужь наIуэ къэхъуащ нэхъ лъэщыр - япэ увыпIэр иратащ Налшык къалэм и курыт еджапIэ №I14-м и гъэсэнхэу Токъуий Валерэ, Урым Давид, Ахъмэт Аминэ сымэ.
Тэрч къалэм и курыт еджапIэ №2-м и щIыхьыр яхъумэу зэпеуэм хэта Iэщыж Iэдэм, Къэжэр Салимэ, Джатэгъэжь Викторие сымэ етIуанэ хъуащ. 
Бахъсэн щIыналъэм хыхьэ Ислъэмей къуажэм и курыт еджапIэ №3-м и командэм ещанэ увыпIэр зэпеуэм къыщихьащ. Абы хэтащ Хьэмжухэ Аслъэнбэч, Беслъэн, Камилэ сымэ. 
Зэхьэзэхуэм къыщыхэжаныкIахэм медалхэр, кубокхэр, щIыхь тхылъхэр иратащ. 
 
Дзюдо
Хъыдзэдж Артур ягу къагъэкIыж
Къэбэрдей-Балъкъэрым СпортымкIэ и министерствэм и телеграм-каналым къызэритамкIэ, дзюдомкIэ зэхьэзэхуэ зэIуха Тэрч къалэм и спорт комплексым иджыблагъэ щекIуэкIащ. Урысейм спортымкIэ и мастер Хъыдзэдж Артур и фэеплъ зэпеуэу щытащ ар. Абы хэтащ Кавказ Ищхъэрэм и щIыналъэхэм я бэнакIуэ щIалэхэри хъыджэбзхэри – псори зэхэту 250-м щIигъу.
Гуп пщыкIухыу гуэшауэ екIуэкIа фэеплъ зэпеуэм кърикIуахэр зэхалъхьэжа нэужь наIуэ къызэрыхъуащи, Къэбэрдей-Балъкъэрым и бэнакIуэхэм япэ увыпIэр яубыдащ. Абыхэм къахьащ дыщэ медалу 9, дыжьыну 9, домбеякъыу 14.
Командэр зэхьэзэхуэм хуагъэхьэзыращ Шаваев Хьэнэфий, Иванов Дмитрий, Джэданэ Залым, Апхуд Андзор, Тау Азэмэт, ГъуэплъащIэ Астемыр, Куп Эдуард, Мырзэ Казбек, Къамбий Мартин, Хъупсырджэн Резуан, Дзухэ Залымджэрийрэ Беслъэнрэ, Къуэшырокъуэ Руслан сымэ.
 
Локобаскетым щынэхъыфI Хьэнэ Ланэ
«Локобаскет – школхэм я лигэ» фIэщыгъэр зэрихьэу Краснодар къалэм и «Локомотив-Кубань» спорт центрым иджыблагъэ щекIуэкIащ баскетболымкIэ курыт еджапIэхэм я урысейпсо зэхьэзэхуэр. 2023 - 2024 гъэхэм зэхэта зэIущIэхэм я кIэух зэпеуэм нэсащ къэралым и щIыналъэхэм я командэ 16.
А зэхьэзэхуэхэм Къэбэрдей-Балъкъэрым и командэм, ди жагъуэ зэрыхъущи, медаль къыщыхуэхьакъым. Ещанэ увыпIэм щхьэкIэ ди еджакIуахэм къапэщIэта Новосибирск областым и гупыр къатекIуэри, еплIанэ увыпIэм ищхьэкIэ кIуэфакъым. 
Ауэ Iыхьэнши хъуакъым: зэхьэзэхуэм щынэхъыфIу къалъытахэм хагъэхьащ ди адыгэ пщащэ цIыкIу Хьэнэ Ланэ икIи «Центровой нэхъыфI» саугъэт щхьэхуэр къратащ. 
 
Iуащхьэмахуэ дэкIынухэм папщIэ
Мы гъэм накъыгъэм и 3-м щегъэжьауэ цIыхухэр гуп-гупурэ Iуащхьэмахуэ и щыгум (метр 5642-рэ) дашын ирагъэжьащ. Апхуэдэ гукъыдэж зыщIхэм ар зрагъэхъулIэфынущ дызэрыт илъэсым и жэпуэгъуэм нэблэгъэху. 
Гъуэгугъэлъагъуэхэмрэ къегъэлакIуэхэмрэ къызэралъытэмкIэ, Iуащхьэмахуэ и щыгу нэхъ тыншу ущихьэфынур шыщхьэуIум и етIуанэ Iыхьэрщ. 
«Iуащхьэмахуэ» курортым и кIапсэ гъуэгухэмкIэ зекIуэну туристхэм папщIэ уасэ щхьэхуэхэр мы гъэми ягъэуващ. Нэгъабэ турист мин 11,5-м щIигъу апхуэдэ ски-пасс билетхэмкIэ зекIуащ.
Мы гъэм Iуащхьэмахуэ и щыгум цIыхухэр дэшыныр зи пщэрылъыр «Кавказ.РФ»-м и къудамэу лажьэ Кавказ Ищхъэрэ къурш клубырщ. Абыхэм я деж къыщыпхуэщэхунущ махуи 8-м тещIыхьауэ зэхагъэува турист турыр. 
Къуршым дэкIын ипэ къихуэу гупхэр метр 3913-рэ лъагапIэм тет «Липрус» хьэщIэщым щIагъэтIысхьэнущ. Ари зи нэIэ щIэтыр «Кавказ.РФ»-рщ. Курортым зегъэужьыным ехьэлIауэ Урысей Федерацэм Экономикэ зыужьыныгъэмкIэ и министерствэм къищта унафэм къызэрыщыгъэлъэгъуамкIэ, къуршыщхьэм щаухуэ хьэщIэщхэр иджырей мардэм къитIасэу, туристхэр зыхуэныкъуэ щымыIэу къызэгъэпэщауэ щытынущ.
 
Европэм и дыжьын медалыр
Алыджым и Луртаки къалэм мы махуэхэм щекIуэкIащ Европэм грэпплинг бэнэкIэ лIэужьыгъуэмкIэ пашэныгъэр къыщыхьыным хуэунэтIа зэхьэзэхуэ. Абы щызэпеуащ къэрал куэдым я бэнакIуэ 200-м щIигъу, я ныбжькIэ илъэс14 – 15 хъухэу. 
Урысей Федерацэм и командэ къыхэхам хэту абы щыIащ Къэбэрдей-Балъкъэрым щыщ Мэздэгу Амир икIи килограмм 53-рэ зи хьэлъагъхэм я деж етIуанэ увыпIэр къыщихьащ. Япэ зэIущIитIыр и хьэрхуэрэгъухэм и къарукIэ фIыуэ ефIэкIыу къафIихьа нэужь, ар IущIащ Къэрэшей-Шэрджэсым и бэнакIуэ Байчоров Елдар. Ди жагъуэ зэрыхъущи, зэпеуэм и бжыгъэр 2:0-у ар къытекIуащ. Апхуэдэ щIыкIэкIэ ди щIалэм Европэм и дыжьын медалыр къихьащ.
Мэздэгу Амир и тренерыр Шыхъуэстэн Русланщ.
ХЬЭЩЫКЪУЕЙ Олег.
  • 44 просмотра
Поделиться: