Европэм и чемпионхэр

3 июня, 2024 - 11:30
Азербайджаным и къалащхьэ Баку иджыблагъэ щекIуэкIащ Европэм «грэпплинг», «грэпплинг-ги» спорт бэнэкIэ лIэужьыгъуэхэмкIэ и чемпионатрэ пашэныгъэр къыщыхьыным хуэунэтIа зэхьэзэхуэрэ. Абы щызэпеуащ къэрал 15-м я спортсмен нэхъ лъэщу 340-м щIигъу. 
Урысей Федерацэм и командэ къыхэхам хэту зэхьэзэхуэм я зэфIэкIхэр щагъэлъэгъуащ Къэбэрдей-Балъкъэрым и гъэсэнхэу Урыс Мухьэмэдрэ Аппаев Амиррэ икIи, ди гуапэ зэрыхъущи, ехъулIэныгъэфI дыдэхэр зыIэрагъэхьащ.
Килограмм 92-рэ хъухэм я деж щыбанэ Урыс Мухьэмэд кIэух зэIущIэр къыфIихьащ Польшэм и спортсмен Фречовиц Пётр. Апхуэдэ щIыкIэкIи Европэм и чемпион хъуащ. 
Абы зыкъыкIэригъэхуакъым килограмм 63-рэ хъухэм я деж зыкъыщызыгъэлъагъуэ Аппаев Амири. Ауэ абы финалыр къызыфIихьар езым и гъусэу Урысейм и командэ къыхэхам хэт Хабичев Амирщ.
Ди щIалэхэр зэхьэзэхуэм хуэзыгъэхьэзырар Шыхъуэстэн Русланрэ Мэш Алимрэщ.                  
КЪАНШЫУЕЙ Алим.
  • 37 просмотров
Поделиться: