Спорт ухуэныгъэхэм - гулъытэ хэха

                   Къэбэрдей-Балъкъэрым Транспортымрэ гъуэгу хозяйствэмкIэ и министерствэм иджыблагъэ къызэритамкIэ, «ГъуэгуфI шынагъуэншэхэр» лъэпкъ пэхуэщIэм и фIыгъэкIэ, республикэм щызэрагъэпэщыжащ спорт ухуэныгъэхэм ухуэзышэ автомобиль гъуэгухэр. 2024 гъэм апхуэдэ лэжьыгъэхэр щIыпIихым щрагъэкIуэкIащ. Абыхэм хуэкIуэ гъуэгухэм псоми зэхэту километр 33-м нэблагъэ я кIыхьагъщ.

Псалъэм папщIэ, Бабугент къуажэм дэтщ Iэпщэрыбанэ спортым щыхуагъасэ еджапIэ. Абы ухуэзышэ гъуэгум асфальтыщIэ тралъхьащ, лъэс лъагъуэхэр хуащIащ, уэздыгъэхэр щыпадзащ. Лэжьыгъэ нэхъыбэ щекIуэкIар Къубэ-Тэбэрэ Къулъкъужын Ипщэмрэ зэпызыщIэ гъуэгурщ. Ар Бахъсэн районым и къуажищым пхрокI икIи Къулъкъужын Ищхъэрэм физкультурэ-узыншагъэр щызэтрагъэувэж и комплексышхуэм ухуешэ.

Шордакъ къуажэм и Школьнэ уэрамымрэ Пролетарскэ жылэм Брянцевым и цIэр зэрихьэу щыIэ уэрамымрэ спортплощадкэхэр, Шэджэм ЕтIуанэ къуажэм Лениным и цIэр зезыхьэ и уэрамым спорткомплексыр тетщ. Иджы ахэр къызыхуэтыншэу зэрызэрагъэпэщыжам и фIыгъэкIэ цIыхухэр нэхъ тыншу а гъуэгухэм щызекIуэ, спорт ухуэныгъэхэм екIуалIэ хъуащ.

Налшык къалэм зэIузэпэщ щащIа, 2-нэ Таман дивизием и цIэр зезыхьэ уэрамым къыбгъурытщ «Налшык» спорт унэшхуэр, Къэбэрдей-Балъкъэрым щыяпэу уэрамым баскетбол ущыджэгу хъу площадкэр, топджэгу губгъуитI щащIащ. Абыхэм республикэ, щIыналъэ зэхьэзэхуэ зэхуэмыдэхэр щрагъэкIуэкI. Апхуэдэуи а гъуэгум ухуешэ Налшык щаухуэ, зи лъэгур мылкIэ къигъэжыкIауэ щытыну  уардэунэми. Абы еубыд метр зэбгъузэнатIэ мини 4-м нэблагъэ, езы мыл утыкум – метр зэбгъузэнатIэ мин I,5-рэ.

                                              ХЬЭЩЫКЪУЕЙ Олег.