Ди къуэш республикэхэм

Зэкъуэш зэпыщIэныгъэхэр

МЕЙКЪУАПЭ. Адыгейм и Iэтащхьэ КъумпIыл Мурат иджыблагъэ IущIащ Иорданием щыIэ Шэрджэс псапащIэ зэгухьэныгъэм и лIыкIуэхэм.

«Хашимит пащтыхьыгъуэм ди лъэпкъэгъу куэд зэрыщыпсэум и фIыгъэкIэ илъэс куэд хъуауэ а къэралым пыщIэныгъэ быдэ худиIэщ. Ди зэныбжьэгъугъэ инми и шэсыпIэщ Урысей Федерацэмрэ Иорданиемрэ я унафэщIхэр ди хэкухэр нэхъ зэпэгъунэгъу щIыным зэрытелажьэр, бизнес, щэнхабзэ зэхущытыкIэхэм зэрызрагъэубгъур», - жиIащ Адыгейм и УнафэщIым.

Апхуэдэуи къыхигъэщащ ди лъэпкъэгъухэм ящыщщ куэд пщIэрэ щIыхьрэ къыхуащIу Иорданием зэрыщыпсэур, къэрал къулыкъухэр зэрыщызэрахьэр, Iуэхугъуэшхуэхэм зэрыхэтыр.

Шэрджэс псапащIэ зэгухьэныгъэм и тхьэмадэ Рушди Ибрэхьим, цIыхубзхэм я Адыгэ Хасэм и гуащэ Къандур Сэтэней, финанс IуэхухэмкIэ зэгухьэныгъэм и унафэщI Мустэфа Мухьэмэд сымэ тепсэлъыхьащ хэкужьым къэзыгъэзэжахэр щетIысэха щIыпIэхэм нэхъ тыншу изэгъэжа зэрыхъуным, адыгэбзэр джынымкIэ щыIэ Iэмалхэм, анэдэлъхубзэ тхылъхэмкIэ еджакIуэхэр къызэгъэпэщыным, Иорданием къикIыу Адыгейм еджакIуэ къакIуэ студентхэм я бжыгъэм хэгъэхъуэным, нэгъуэщIхэми.

ХьэщIэщхэм къахохъуэ

ЧЕРКЕССК. Къэрэшей-Шэрджэсым и курорт щIыпIэхэм хьэщIэщ зэхуэмыдэу 700-м нэблагъэ нобэкIэ щыIэщ.

«Республикэм туризмэм жыджэру зэрызыщиужьым и фIыгъэкIэ щIыналъэм къакIуэ туристхэм я бжыгъэми къыхохъуэ. Абы къыхэкIыуи, ахэр къыщызэтеувыIэну хьэщIэщхэри нэхъыбэ мэхъу. Псалъэм папщIэ, 2022 гъэм щегъэжьауэ хуэдищкIэ къыхэхъуащ икIи абыхэм я бжыгъэр 680-м зэрынэхьэсащ», - къитащ иджыблагъэ КъШР-м Туризмэмрэ курортхэмкIэ и министерствэм.

Псалъэм къыдэкIуэу, Архъызым щыIэщ хьэщIэщ зэхуэмыдэу 393-рэ, Софийскэ гъэхъунэм - 53-рэ, «Романтик» турист къуажэ цIыкIум – 22-рэ, Домбейм - 135-рэ, Теберда - 78-рэ.

Министерствэм и лэжьакIуэхэм зэрыжаIамкIэ, хьэщIэщхэм я бжыгъэм къыщIыхэхъуэр щIыналъэм туристхэр куэду къызэрыкIуэрщ зи фIыгъэр. Дызэрыт илъэсым зэрыщIидзэрэ республикэм цIыху мелуанрэ ныкъуэм зыщагъэпсэхуащ икIи мы гъэм и кIэм а бжыгъэр мелуани 2,3-м нэсын гугъэхэр щыIэщ.

Къыхэдгъэщынщи, республикэм къэкIуэн ипэкIэ, абы и хьэщIэщхэм зыщезыгъэтххэм процент 36-кIэ хэхъуащ. 2030 гъэм ирихьэлIэу Къэрэшей-Шэрджэсым къакIуэ туристхэм я бжыгъэр мелуаниплIым нигъэсыныр республикэм и плъапIэщ.

Я щыуагъэр къагурыIуэжа?

СЫХЪУМ. Абхъазымрэ Осетие Ипщэмрэ къуаншагъэ зэракIэлъызэрихьар Куржым къилъытэжащ. Ар иджыблагъэ жиIащ Тбилиси къалэм и унафэщI Каладзе Кахи.

«Куржыр захуакъым Абхъазымрэ Осетие Ипщэмрэ ятеухуауэ. Иджы Тбилиси къыпэщылъщ зэкIужыным ухуэзышэ лъэбакъуэхэр ичыну. Дэ къедгъэгъэзэжын хуейщ япэм зэхудиIа зэхущытыкIэфIхэм, ди дзыхь зэдгъэзу щыщыта зэманым, адэкIэ дызэгъусэу дызэдэпсэун папщIэ. Дэ псоми къытпэщылъщ абы дегупсысыну. Дэри дыкъуэншащ, дызэкIужын папщIи тхузэфIэкI къэдгъанэ хъунукъым», - жиIащ Каладзе Кахи.

Къыхигъэщащ фIым къимышэр ем къызэримыхьынур, къарукIэ зэпэщIэтыныр гъэувыIауэ дахэкIэ зэгурыIуэн зэрыхуейр.