Лъэщу зыкъагъэлъагъуэ

«GRANDMASTER OPEN» фIэщыгъэр зэрихьэу тхэквондомкIэ (ВТФ, Олимп джэгухэм хыхьэ спорт лIэужьыгъуэмкIэ) «Грандмастер» спорт клубым и чемпионатрэ зэхьэзэхуэ зэIухарэ Дон Iус Ростов­ ­къалэм иджыблагъэ щекIуэкIащ. Абы хэтащ къэралым и щIыналъэхэм я спортсмен 650-м нэблагъэ, 25-р Къэбэрдей-Балъкъэрым и «Пять колец» спорт академием и гъэсэну. 

ГъэщIэгъуэну икIи удэзыхьэхыу командэхэм ирагъэкIуэкIа зэIущIэхэм къарикIуахэр зэхалъхьэжа нэужь, ди республикэм икIа гупым ещанэ увы­пIэр къыхуагъэфэщащ. Мыбдежым япэ увыпIэр хэгъэ­рей­хэм яубыдыжащ, ещанэр – Краснодар крайм и лIыкIуэхэрщ. 
Щхьэзакъуэ зэпеуэхэм дыщэ медалхэр къахьащ Тхьэмокъуэ Элинэ, Шарифовэ Сарэ, Къэзанш Къэсболэт, Iусен Къэмболэт, Хъущт Зэирэ сымэ. ЕтIуанэ увыпIэр яубыдащ Къумахуэ Рианэ, Шарифовэ Камилэ, Шыд Данэ, Пэфыф Эвелинэ, Орловэ Марие сымэ.
Мылъкъуэнды Дамир зэхьэзэхуэм ещанэ щы­хъуащ. 
Командэм дэлажьэр Ахъмэт Амиррэ Унэжокъуэ Абдельджэбаррэщ.