Спорт хъыбархэр

Дзюдо

Уэзы Iэдэм и домбеякъ медалыр

Босниемрэ Герцеговинэмрэ я къалащхьэ Сараевэ мазаем и 8 - 9-хэм щекIуэкIащ дзюдомкIэ Европэм и Кубокыр къэхьыным хуэунэтIа зэхьэзэхуэ. Абы щызэпеуащ къэрал 22-м я бэнакIуэу 400-м нэблагъэ, я ныбжькIэ илъэс 17-м къыщыщIэдзауэ 22-м нэсыху хъухэу.
Урысей Федерацэм и щIыхьыр яIэту зэхьэзэхуэм щыIащ, щIалэхэри хъыджэбзхэри зэхэту, спортсмен 51-рэ. Абыхэм я гъусащ Къэбэрдей-Балъкъэрым и бэнакIуэ Уэзы Iэдэм икIи и хьэлъагъ елъытауэ зыхэта гупым (кг 66-рэ) ещанэ увыпIэр къыщихьащ. 
Ди щIалэм и тренерхэр Дзухэ Беслъэнрэ Залымрэщ. 
Ди гуапэ зэрыхъущи, Европэм и Кубокыр а зэхьэзэхуэм къыщихьащ Къэрэшей-Шэрджэсым хыхьэ Псыжь къуажэм щыщ Гуэгуэ Анзор. Ар щыбанэр килограмм 60 зи хьэлъагъхэм я дежщ, и тренерыр КIыщмахуэ Русланщ. 

БэнэкIэ хуит

                          Тезадэр етIуанэщ

Кавказ Ищхъэрэм бэнэкIэ хуитымкIэ пашэныгъэр щыубыдыным теухуауэ Мэхъэчкъалэ щекIуэкIа зэхьэзэхуэм дыжьын медаль къыщихьащ Къэбэрдей-Балъкъэр къэрал университетым и студент Тезадэ Валерие. Апхуэдэ хъыбар иджыблагъэ зэбгригъэхащ Дзэлыкъуэ щIыналъэ администрацэм и пресс-IуэхущIапIэм. 
Дагъыстэным и къалащхьэм щызэхуэсат КИФЩI-м и щIыналъэхэм я бэнакIуэхэр, я ныбжькIэ илъэс 21-м щIимыгъуахэу икIи килограмм 68-рэ зи хьэлъагъхэм я деж абы щыбэна, Дзэлыкъуэкъуажэ щыщ Тезадэ Валерие етIуанэ увыпIэр къихьащ. 

Бокс

Владикавказ зыкъыщагъэлъэгъуэнущ

Бахъсэн къалэм ЩэнхабзэмкIэ и унэм щекIуэкIащ Къэбэрдей-Балъкъэрым боксымкIэ пашэныгъэр къыщыхьыным хуэунэтIа зэхьэзэхуэ. Абы щызэпеуащ республикэм и щIыналъэхэм я боксер нэхъыфIу 100-м щIигъу.
Зэпеуэм хэтахэр 2011 - 2012 гъэхэм къалъхуахэрщ икIи ахэр щIэбэнащ медаль комплекту 21-м. Зэхьэзэхуэм япэ увыпIищыр къыщызыхьахэм иратащ медалхэр, кубокхэр, щIыхь тхылъхэр. Абыхэм къадэкIуэу, ахъшэ саугъэтхэр щхьэхуэу иратащ «Боксер нэхъыфI», «ТекIуэныгъэм ерыщу зэрыщIэбэнам папщIэ», «КъыдэщIахэм зэхьэзэхуэм щынэхъыфIауэ къалъыта» зэхьэзэхуэхэм щытекIуахэм. 
Иджы екIуэкIа зэпеуэм япэ увыпIэхэр къыщызыхьахэр хэтынущ КИФЩI-м боксымкIэ пашэныгъэр къыщыхьыным хуэунэтIауэ мы гъэм гъатхэпэм и 3 - 9-хэм Владикавказ къалэм щызэхашэну зэхьэзэхуэм. 
Мыдрейуэ Бахъсэн къалэм и гъэсэнхэм медаль зэхуэмыдэу хы абы щызыIэрагъэхьащ. Я хьэлъагъ елъытауэ зыхэта гупхэм щытекIуахэщ Джатэжь Дамиррэ (кг 63-рэ) Гындыгъу Имранрэ (кг 75-рэ). 
КхъуэIуфэ Амиррэ Къурш Рэмэзанрэ (кг 48-рэ) дыжьын медалхэр къахьащ. Бэрбэч Маратрэ (кг 46-рэ) Багъ Иналрэ (кг 48-рэ) ещанэ хъуахэщ.
ЩIалэхэр зэхьэзэхуэм хуагъэхьэзыращ Бахъсэн Нурмухьэмэд, Бэрэгъун Аскэр, Алътудокъуэ Хьэсэн, Батырдэгу Рэмэзан, Джэрыджэ Ислъам сымэ.