Спорт хъыбархэр

25 февраля, 2025 - 10:44
Тренер цIэрыIуэм и фэеплъу
ДзюдомкIэ тренер Майсурадзе Альберт и фэеплъу щIыналъэхэм я зэхьэзэхуэ екIуэкIащ. Ди республикэм и спортсменхэм я гъусэу абы щыбэнащ Осетие Ищхъэрэ – Аланием къикIахэри. Зэхьэзэхуэм щызэпеуахэр 2013 гъэм къалъхуа ныбжьыщIэхэрщ.
Я хьэлъагъ елъытауэ зыхэта гупхэм япэ увыпIэхэр къыщахьащ Кокоев Георгий (кг 30), Къуэн Темырлан (34-рэ), Къунаш Темырлан (кг 38-рэ), Шыгъушэ Алихъан (кг 42-рэ), Пэфыф Альберт (кг 46-рэ), Хъуран Iэсхьэд (кг 50), Атэбий Щамил (кг 55-рэ), КIэш БетIал (кг 60), Алъхъэс Дамир (кг 66-рэ), Кочкаров Азэмэт (кг 66-рэ) сымэ.
Зэхьэзэхуэм япэ увыпIищыр къыщызыхьахэм медалхэмрэ фэеплъ саугъэтхэмрэ иратащ. 
 
Нэхъ лъэщхэр зэхагъэкI
Къэбэрдей-Балъкъэрым СпортымкIэ и министерствэм Ныр Сеф и цIэр зезыхьэ и спорт еджапIэм иригъэкIуэкIащ КъБР-м дзюдомкIэ пашэныгъэр къыщыхьыным хуэунэтIа зэхьэзэхуэ. Абы щызэпеуащ республикэм и щIыналъэхэм я бэнакIуэ ныбжьыщIэхэр.
Я хьэлъагъ елъытауэ зыхэта гупхэм щытекIуащ Асадов Астемыр, Могушков Тимур, Дадуев Суфьян, Къардэн Мухьэмэд, Гавриш Денис, Ацкъан Альбэч, Къардэн Темболэт, Натадзе Георгий, Баший Алим, Бышэн Изабеллэ, Къущхьэ Ясминэ, ХьэцIыкIу Дианэ, Мизиевэ Алсурэ сымэ. 
БэнакIуэхэр зэхьэзэхуэм хуагъэхьэзыращ Иванов Дмитрий, Апхуд Андзор, Ким Руслан, Дзухэ Беслъэнрэ Залымрэ, Куп Эдуард, Джэданэ Залым, Къуэшырокъуэ Астемыр, Тау Азэмэт, Унэж Алик, Борыкъуей Юрэ, Рахманов Валерэ, ГъуэплъащIэ Астемыр, Сэральп Олег, Мырзэ Казбек, Емкъуж Рустам, Къамбий Мартин сымэ. 
 
ЗауэлIхэм я щIыхькIэ
СамбэмкIэ урысейпсо зэхьэзэхуэ Орел къалэм щекIуэкIащ. ВДВ-м и 6-нэ ротэм и десантникхэм зэрахьа лIыгъэм и фэеплъу щытащ ар. Зэхьэзэхуэм хэтащ Къэбэрдей-Балъкъэрым, Белгород, Воронеж, Калугэ, Курск, Мэзкуу областхэм, Мэзкуу, Орёл къалэхэм я командэхэр, щIалэхэри хъыджэбзхэри зэгъусэу спортсмени I30-м щIигъу, я ныбжькIэ илъэс I4 - I6-м щIимыгъуауэ. 
Ди командэм бэнакIуитху хэтати, абыхэм ящыщу Бозий Жамболэт япэ увыпIэр къыщихьащ килограмм 46-рэ зи хьэлъагъхэм я деж. Евлоев Рэмэзанрэ (кг 58-рэ) Къарэмызэ Арсенрэ (кг 64-рэ) ещанэ хъуахэщ.
ЩIалэхэр зэхьэзэхуэм хуагъэхьэзыращ Хъумар Марат, Соблыр Рустам, Къущхьэ Жамболэт сымэ. 
ЗэIущIэм япэ увыпIэхэр къыщызыхьахэр хэтынущ УФ-м самбэмкIэ пашэныгъэр къыщыхьыным хуэунэтIауэ мы гъэм гъатхэпэм и I5 - 20-хэм Оренбург къалэм щекIуэкIыну зэхьэзэхуэм. 
 
Ди деж щызэхуэзэжынущ
«Налшык» спорт комплексым щекIуэкIащ Къэбэрдей-Балъкъэрым мас-рестлингымкIэ и II-нэ чемпионатрэ пашэныгъэр къэхьыным хуэунэтIа зэхьэзэхуэрэ. Абы хэтащ республикэм и спортсмени I00-м щIигъу, гупитхуу гуэшауэ. 
Я хьэлъагъ елъытауэ зыхэта гупхэм бжьыпэхэр щаубыдащ Псэун Тембот, Чылар Елдар, МыкIуэф Идар, Щоджэн Ислъам, Кузьмин Даниель, Мэкъуауэ Рахьим, Щоджэн Алихъан, Ныр Iиляс, Мамбэт Къамболэт, Кхъуэныхь Темболэт, Занкишиев Имран, Джанукуевэ Эллинэ, Тохъутэмыщ Аделинэ, Михайлюк Екатеринэ, Щомахуэ Къантемыр, Бекъан Ратмир, Сатушы Темырлан, КIэмыргуей Ратмир, Нэгъуей Аслъэнджэрий, Бозий Аскэрбий, Къасым Альберт, Бэрбэч Хъусен, Ржевская Еленэ сымэ. 
Зэхьэзэхуэм щытекIуахэр хагъэхьащ КъБР-м и командэ къыхэхам икIи ахэр хэтынущ УФ-м мас-рестлингымкIэ пашэныгъэр къыщыхьыным хуэунэтIауэ мы гъэм мэлыжьыхьым и I7 - 20-хэм Налшык къалэм щрагъэкIуэкIыну зэпеуэм. 
АЛБЕРДЫКЪУЭ Iэмин.
  • 24 просмотра
Поделиться: