ТекIуауэ къагъэзэж

«ЛокоДзюдо» фIэщыгъэр зэрихьэу Новосибирск къалэм и «Локомотив-Арена» спорт комплексым щекIуэкIащ дзюдомкIэ сабийхэм я лигэм хэт командэхэм я зэхьэзэхуэ. Абы щызэпеуащ къэралым и щIыналъэхэм ящыщу 24-м я бэнакIуэ ныбжьыщIэу, щIалэхэри хъыджэбзхэри зэхэту, 600-м нэблагъэ, 2012 - 2013 гъэхэм къалъхуахэу. 
Къэбэрдей-Балъкъэрым и командэм ехъулIэныгъэфIхэр зэхьэзэхуэм щызыIэригъэхьащ, медаль зэхуэмыдэхэр къыщихьащ. Я хьэлъагъ елъытауэ зыхэта гупхэм япэ увыпIэхэр щаубыдащ Джафаров Инал (кг 38-рэ), Абазэ Самир (кг 42-рэ), Къэжэр Самир (кг 46-рэ), Срыкъуэ Ахьмэд (кг 50) сымэ. 
Килограмм 46-рэ зи хьэлъагъхэм я деж домбеякъ медаль къыщихьащ Дидан Идар. 
ЩIалэ цIыкIухэр псори «Локомотив» клубым и гъэсэнщ, абыхэм ядэлажьэр УФ-м щIыхь зиIэ и тренер Джэданэ Залымрэ Мырзэбэч Азэмэтрэщ. 
Фигу къэдгъэкIыжынщи, «ЛокоДзюдо»-мкIэ сабий лигэр 2016 гъэм къызэрагъэпэщауэ щытащ икIи абы щегъэжьауэ илъэс къэс къэралым и щIыналъэхэм зэхьэзэхуэхэр щрагъэкIуэкI. Абы щызэпеуэхэр илъэси 10 - 13 зи ныбжь бэнакIуэхэрщ. 
Мы гъэм абы и зэхьэзэхуэу II ирагъэкIуэкIынущ, Новосибирск щызэхэтар ещанэу аращ. Илъэсым кърикIуахэр зэхалъхьэжа нэужь, я хьэлъагъ елъытауэ зыхэта гупхэм нэхъыбэрэ щытекIуа спортсмени 8-р етIанэгъэ и пэщIэдзэ мазэхэм Мэзкуу къалэм щекIуэкIыну кIэух зэпеуэм щыбэнэнущ.