Атхъан Европэм къыщыхожаныкI

20 мая, 2025 - 13:02

Европэм и Кубокыр дзюдомкIэ кадетхэм я деж къыщыхьыным хуэунэтIа зэхьэзэхуэ зэIуха Куржым и къалащхьэ Тбилиси щекIуэкIащ. Абы хэтащ къэрал I5-м я бэнакIуэ 340-рэ, я ныбжькIэ илъэс 18-м щIимыгъуахэу. 
Урысей Федерацэм и командэ къыхэхам хэту абы кIуат спортсмен 48-рэ: 23-р щIалэу, 25-р – хъыджэбзу.
Ди къэралми Къэбэрдей-Балъкъэрми я пщIэр иIэту зэхьэзэхуэм хэтащ БищIо Атхъан икIи, ди гуапэ зэрыхъущи, килограмм 73-рэ зи хьэлъагъхэм я деж ещанэ увыпIэр къыщихьащ. 
Ди щIалэм и япэ зэIущIэр дригъэкIуэкIащ хэгъэрейхэм я бэнакIуэ лъэщым икIи ар къытекIуащ. Хэт ищIэрэ, занщIэу абыкIэ зэпеуэр иримыгъэжьауэ щытамэ, нэхъыбэ хузэфIэкIыну къыщIэкIынт ди щIалэм. Абы иужькIэ Атхъан хагъэхьащ ещанэ увыпIэм щIэбэныну гупым. 
Мыбдежым абы зэIущIиплI щригъэкIуэкIати, и хьэрхуэрэгъухэм ахэр къафIихьащ, къызэрытекIуэн зы Iэмали яримыту. Апхуэдэ щIыкIэкIи, европей Кубокым и домбеякъ медалыр къихьащ.
БищIо Атхъан и ныбжьыр илъэс I7 хъууэ аращ, зэрыжаIэу, зэфэну псыр иджыри къэжакъым, и мурадхэр къехъулIэну ди гуапэщ, и текIуэныгъэ дахэхэмкIэ куэдрэ дигъэгуфIэну дыщогугъ.
ЩIалэр зыгъасэр УФ-м щIыхь зиIэ и тренер Джэданэ Залымщ. 

ХЬЭЩЫКЪУЕЙ Олег.
  • 38 просмотров
Поделиться:

Читать также:

12.11.2025 - 17:18 → Спорт хъыбархэр
11.11.2025 - 15:00 → Ахъмэт Амир и гъэсэнхэм Кубокыр къахь
10.11.2025 - 17:02 → Спорт зэхьэзэхуэхэр
09.11.2025 - 12:23 → Ди ныбжьыщIэхэр нэхъ лъэщщ
08.11.2025 - 16:44 → Спорт хъыбархэр