Жаным Аслъэн и фэеплъу

СССР-м спортымкIэ щIыхь зиIэ и мастер, Европэм алыдж-урым бэнэкIэмкIэ и чемпион, дунейпсо Кубокыр къэзыхьа Жаным Аслъэн и фэеплъ зэхьэзэхуэ Налшык къалэм щекIуэкIащ. Абы щызэпеуащ Къэбэрдей-Балъкъэрым, Шэшэным, Осетие Ищхъэрэ – Аланием, Ставрополь крайм я бэнакIуэ 300-м щIигъу, 2011 - 2014 гъэхэм къалъхуауэ.
Нэхъыжь гупым хэтхэм зэхьэзэхуэм дыщэ медалу 9, дыжьыну 6, домбеякъыу 17 къыщахьащ. Япэ увыпIэхэр яубыдащ Хьэбил Идар (кг 35-рэ), Дыкъынэ Руслан (кг 38-рэ), ГъуэплъащIэ Iэдэм (кг 42-рэ), Ажэгъуей Амир (кг 45-рэ), Къардэн Ратмир (кг 48-рэ), Емкъуж Сулеймэн (кг 52-рэ), Шыдакъ Салим (кг 57-рэ), Бахъуэ Азрэт (кг 62-рэ), Саншокъуэ Ислъам (кг 65-рэ) сымэ.
НэхъыщIэхэми абыхэм зыкъыкIэрагъэхуакъым: дыщэу 11, дыжьыну 5, домбеякъыу I4 щызыIэрагъэхьащ зэпеуэм. Мы гупым япэ щыхъуащ Мамышэ Самир (кг 27-рэ), Нот Iэмин (29-рэ), Нэгъуей Темырлан (кг 32-рэ), Къарэмызэ Кемран (кг 35-рэ), Джэршыш Тимур (кг 38-рэ), Жылэхьэж Алим (кг 42-рэ), ГъукIакъуэ Назар (кг 45-рэ), Хьэпэ Эмир (кг 48-рэ), Думэныщ Азэмэт (кг 51-рэ), ГъукIапщэ Къантемыр (кг 55-рэ), Щоджэн Айдар (кг 60) сымэ. 
Жаным Аслъэн и фэеплъ зэхьэзэхуэм КИФЩI-м пщIэшхуэ щиIэщ икIи абы хэтыну къакIуэхэм я бжыгъэм илъэс къэс хохъуэ, щыжаIащ КъБР-м СпортымкIэ и министерствэм.

Европэм макIуэ

Европэм бэнэкIэ хуитымкIэ пашэныгъэр къыщыхьыным хуэунэтIауэ Италием и Каорле къалэм мы махуэхэм щекIуэкI зэхьэзэхуэм УФ-м и командэ къыхэхэм хэту я зэфIэкIхэр щагъэлъэгъуэнущ Къэбэрдей-Балъкъэрым и бэнакIуэ щIалищым. Ахэр Бакъей Имран, Даур Амир, Щад Рэмэзан сымэщ.
УФ-м и командэм хэтынухэм я цIэхэр иджыблагъэ къриIуащ тренер нэхъыжь Царгуш Денис. Ди щIалэхэм нэмыщI, апхуэдэ щIыхьхэр ягъуэтащ Алмазов Абдула, Кондрашов Никитэ, Кондрашов Кирилл, Гурбанов Ислъам, Батыров Казманбет, Исаев Абдул-Рэхьим, Цыбиков Сэнге, Балгаев Муслим, Унэрокъуэ Iэмал, Лайпанов Ахьмэд сымэ. 
ЗэIущIэхэр екIуэкIынущ мэкъуауэгъуэм и 25 - 26-хэм.