Дыщэ медалыр къехь

 Самбэ

  Краснодар къалэм дэт «СамбэмкIэ уардэунэ» спорт комплексым щекIуэкIащ самбэмкIэ «Гран-При» дунейпсо зэхьэзэхуэ. Ди къэралым и спортсменхэр яхэту абы щызэпеуащ Абхъазым, Ермэлым, Белоруссием, Алыджым, Къэзахъстаным, Къыргъызым, Таджикистаным я бэнакIуи 100-м нэблагъэ.

 Ди гуапэ зэрыхъущи, «спорт самбэ» унэтIыныгъэмкIэ килограмм 88-рэ зи хьэлъагъхэм я деж Абазэ Аслъэн дыщэ медаль къыщихьащ.

  Фигу къэдгъэкIыжынщи, ныбжьыщIэм бэнэн щыщIидзар Бахъсэн къалэм Щауэ Iэхьед и цIэр зезыхьэ и спорт еджапIэрщ, иужькIэ Армавир самбэмрэ дзюдомкIэ дэт спорт еджапIэм кIуащ. Ар Урысейм дунейпсо классымкIэ спортым и мастерщ, БРИКС-м хыхьэ къэралхэм я Спорт джэгухэм нэгъабэ щытекIуащ, дунейпсо Кубокыр къэхьыным хуэунэтIауэ Къыргъызым щекIуэкIа зэхьэзэхуэри къихьащ.

Абазэ Аслъэн и тренерхэр ПшынащIэ Мурат, Уэщхъун Башир, Псэун Мурат сымэщ.

КЪАНШЫУЕЙ Алим.