ЩIыналъэхэр зэхоуэ

Налшык къалэм и «Спартак» стадионым щекIуэкIащ «Районхэм я зэхэуэ» щIыналъэ зэхьэзэхуэм и кIэух зэIущIэхэр. Финалым щызэхуэзащ Бахъсэн къалэм и командэмрэ Терекскэ къуажэм и топджэгу гупымрэ. ЗэIущIэм и бжыгъэр 3:2-уэ мыбдежым япэ увыпIэр бахъсэндэсхэм къахьащ. Тэрч щIыналъэм и лIыкIуэхэр етIуанэ хъуащ. Ещанэ увыпIэр зэдагуэшащ Псыгуэнсурэ Джэрмэншыкрэ къуажэхэм я командэхэм.

Къыхэдгъэщынщи, «Районхэм я зэхэуэ» щIыналъэ зэхьэзэхуэр мазитIкIэ екIуэкIащ икIи абы къызэщIиубыдащ КъБР-м и район псори. Ипэ илъэсхэм хуэдэуи, мы гъэм ар къызэрагъэпэщащ икIи ирагъэкIуэкIащ Мидаевхэ Уэсмэнрэ Умаррэ зэкъуэшитIым, КъБР-м ЩIалэгъуалэ IуэхухэмкIэ, СпортымкIэ и министерствэхэр, хьэрычэтыщIэхэр къадэIэпыкъуу.

Футбол зэIущIэр щызэхуащIыжым къэпсэлъащ КъБР-м ЩIалэгъуалэ IуэхухэмкIэ и министр Лу Азэмэт. «Спорт къэхъукъащIэ нэхъ инхэм, ди щIалэгъуалэр ипэжыпIэ зыщIэхъупсхэм хуэдэ хъуащ «Районхэм я зэхэуэр». Нобэ абы къызэщIеубыдэ командэ 70, спортсмену 1500-м щIигъу, пщIы бжыгъэкIэ натынхэр ягъэлъагъуэ, футболым дихьэххэр мин бжыгъэкIэ абыхэм кIэлъоплъ». – жиIащ министрым.

КъБР-м спортымкIэ и министрым и къуэдзэ Хэжь Заур къызэрыхигъэщамкIэ, мыбы хуэдэ Iуэхугъуэхэм къалэнышхуэ ягъэзащIэ –республикэм и цIыху нэхъыбэ футболым драгъэхьэх.

 Фигу къэдгъэкIыжнщи, «Районхэм я зэхэуэ» пэхуэщIэр хэтщ Урысей футбол зэгухьэныгъэм иригъэкIуэкI «Урысейр – футбол къэралщ» зэхьэзэхуэм. Ар илъэсищ хъуауэ мэлажьэ, зэIущIэхэр ирагъэкIуэкI командэ къэс топджэгуи 8 хъууэ, таймитIу гуэшащ, тIуми дакъикъэ 15 я кIыхьагъыу. Абы нэмыщI,  кIэух зэхьэзэхуэм ВАР Iэмалыр къыщагъэсэбэп. 

Мидаев Уэсмэн зэрыжиIамкIэ, зэхьэзэхуэм къыхыхьэ командэхэм я бжыгъэм илъэс къэс къыхохъуэ, КъБР-м и щIыналъэхэми нэхъ мащIэ дыдэу командипщI щоджэгу.

«Ди къалэн нэхъыщхьэр республикэм и районхэм я цIыхухэр зэрыдгъэубыдынырщ. ЕдгъэкIуэкI зэIущIэхэм кIэлъыплъыну къакIуэм и нэхъыбэр унагъуэщ - сабийхэри, нэхъыжьхэри зэгъусэщ. КъызэрыщIэкIымкIи, ди унагъуэхэр быдэ хъунум, узыншэным, зэгъусэу нэхъыбэрэ зэманыр зэдагъэкIуэным мыр и зы IэмалыфIщ», - жиIащ абы.

                                                                    ХЬЭТIОХЪУЩОКЪУЭ Аслъэн.