Уемыш, умызэши уи Iуэху хъунщ
Бразилием къиIэпхъукIыжа цIыхубзым кхъуей щищIыну IуэхущIапIэм и лэжьыгъэр щызэтреухуэ Амурскэ областым. ИлъэситIкIэ узэIэбэкIыжмэ, Волковэ къуажэм къыдэтIысхьэжа Ануфриевэ - Егорофф Агриппинэ щIымахуэ дызыхуэкIуэм иригъэжьэну щогугъ завод мыиныр икIи моцареллэ кхъуей лIэужьыгъуэр Китайм иригъашэу щIидзэну и мурадщ.
А лэжьыгъэ гугъум зезыпщыта цIыхубзым и хъыбар зэхэзыха къэрал къулыкъущIэхэри щIэгъэкъуэн хуохъу абы, и жэрдэмыр къехъулIэнымкIэ. Псалъэм папщIэ, шыщхьэуIум и 18-м абы и унэм хуеблэгъащ Урысейм мэкъумэш IэнатIэмкIэ и министрым и къуэдзэ Хьэту Жамболэт, нэхъ ипэIуэкIэ Агриппинэ и Iуэху зытетхэм зыщигъэгъуэзащ Амурскэ областым и губернатор Орлов Василий.
«Гуапэщ унагъуэм ди щIыналъэм зэрызыщиужьыр плъагъуну. Абы и псэукIэр фIы дыдэу зэтриухуащ, къабзэлъабзэщ, езы унэгуащэри цIыху зэтеубыдащ, и псалъэр мащIэрэ ищIэр куэду апхуэдэщ. Кхъуей щищIыну IуэхущIапIэм ар цIыхухэм щаIуигъахуэрэ и IэдакъэщIэкIыр къазэрыщыхъур къыжраIэжу щыщытыну пэши зэрыхэтынур щIыналъэм туристу къекIуалIэхэм я бжыгъэр нэхъыбэ хъуным зэрыхуэщхьэпэнур си фIэщ мэхъу. Сэ сIухат пасэ зэманым зэрыхахыу щытам тету игъэхьэзыра моцареллэ кхъуей лIэужьыгъуэри, къуажэм щагъэхъу жэмхэм я шэм къыхэщIыкIа а ерыскъыгъуэр икъукIэ гурыхь сщыхъуащ. Шэч къытесхьэркъым абы щIэупщIэ зэриIэнум», - жиIащ Орловым.
Хьэту Жамболэт мэкъумэш IэнатIэм лэжьэн щыщIэзыдзэ хьэрычэт IуэхущIапIэм и унафэщIыр илъэс ипэкIэ къигъэгугъат абы зыщIигъэкъуэну икIи, и псалъэм тетыжу, абы сэбэп хуэхъуащ и Iуэху зэтеувэнымкIэ. Иджы Хьэтум щыгъуазэ зищIащ цIыхубзыр дэзыхьэх Iуэхум зэрызригъэужьыфам. Хьэрычэт зыхэлъ, мылъкуи бгъэдэмылъу, и къуэр и гъусэу къэралым къэIэпхъуэжыным тегушхуэу зи Iуэху зэтезыухуэфа бзылъхугъэм и зэфIэкIым щыгуфIыкIащ ар.
Агриппинэ щогуфIыкI и Iуэхур зэтеухуа зэрыхъум икIи къэрал властым и лIыкIуэхэм фIыщIэ яхуещI зэрызыкъыщIагъэкъуам папщIэ.
Мы цIыхубзым и къекIуэкIыкIар гъэщIэгъуэнщ.
И унагъуэ Iуэхухэр зэкIэлъымыкIуэ щыхъум, ар тегушхуащ и адэжьхэм я хэкум къэIэпхъуэжыну. Урысейр зи хэкуу къэзылъытэхэр Бразилиемрэ Уругваймрэ къигъэIэпхъукIыжыным хуэунэтIа къэрал программэм ипкъ иткIэ 2018 гъэм япэу къэкIуэжахэм ящыщщ ар. «Къуажэхэм зегъэужьыныр» къэрал программэр къигъэсэбэпри, абы ипотекэкIэ унэ къищэхуащ. Абы кIэлъыкIуэу щIыхуэ къищтэри, кхъуей щыхихыну IуэхущIапIэ мыин ищIащ. ИджыпстукIэ кхъуей куэд ищIыркъым. Ауэ щэкIуэгъуэм IуэхущIапIэм и ухуэныгъэр и кIэм нигъэсыфмэ, зы жэщ-махуэм кхъуей килограмм 60 щищIыфынущ.
«Уемыш, умызэши уи Iуэху хъунщ», жыхуаIэм щыхьэт техъуэми ярейщ лэжьыгъэм щымышынэ мы бзылъхугъэм и гъащIэр.
Нобэ
♦Москва къыщызэIуах «Спасскэ чэщанэр» фестивалыр. Абы хэтыну ирагъэблэгъащ «Кабардинка» къэрал академическэ къэфакIуэ гупыр.
♦1851 гъэм Санкт-Петербургрэ Москварэ зэпызыщIэ гъущI гъуэгум мафIэгухэр пIалъэ убзыхуам тету щызекIуэныр зэтраублауэ щытащ.
♦1920 гъэм Урысейм цIыхуу щыпсэур зыхуэдизыр зрагъэщIэн папщIэ, совет къэралыгъуэщIэм и Правительствэм и унафэкIэ, ахэр япэу ябжауэ щытащ.
♦1924 гъэм Налшык къыщызэрагъэпэщащ ФизкультурэмкIэ областной совет.
♦1936 гъэм Японием къыщызэрагъэпэщащ «Тойота» автомобиль компаниер.
♦1941 гъэм СССР-м и Совет Нэхъыщхьэм унафэ къищтащ Волгэ Iуфэм Iус нэмыцэхэр а щIыпIэм игъэIэпхъукIауэ Сыбырым, Къэзахъстаным, Курыт Азием шэным теухуауэ. Нэмыцэхэм я совет автономием и цIыхухэм шэч хуащIат фашистхэм ядэIэпыкъуу. Ахэр зэрымыкъуэншар 1964 гъэм хэIущIыIу хъужауэ щытащ.
♦1974 гъэм СССР-м и Министрхэм я Советым унафэ къищтащ къэралым паспорт зэрыщат хабзэм зэхъуэкIыныгъэхэр хэлъхьэным теухуауэ.
♦1749 гъэм къалъхуащ нэмыцэ щIэныгъэлI, усакIуэ Гёте Иоганн Вольфганг.
♦1925 гъэм къалъхуащ совет тхакIуэ-фантаст, зэдзэкIакIуэ Стругацкий Аркадий.
♦1925 гъэм къалъхуащ совет тхакIуэ, сценарист Трифонов Юрий.
♦1933 гъэм къалъхуащ физико-математикэ щIэныгъэхэм я доктор, КъБКъУ-м и профессор Щокъуий Владимир.
♦1939 гъэм къалъхуащ совет актёр, УФ-м и цIыхубэ артист Ивашов Владимир.
♦1948 гъэм къалъхуащ урысей актрисэ, УФ-м и цIыхубэ артисткэ Гундаревэ Наталье.
♦1954 гъэм къалъхуащ КъБР-м щIыхь зиIэ и журналист Мыз Ахьмэд.
♦1954 гъэм къалъхуащ КъБР-м физкультурэмрэ спортымкIэ щIыхь зиIэ и лэжьакIуэ ГъуэплъащIэ ТIэхьир.
Дунейм и щытыкIэнур
«pogoda.yandex.ru» сайтым зэритымкIэ, Налшык пшэр техьэ-текIыу щыщытынущ. Хуабэр махуэм градус 26 - 27-рэ, жэщым градус 18 - 19 щыхъунущ.
Лъэпкъ Iущыгъэ:
Гъуэгy напщIэ сабэм мэкъу щеуэркъым, ер зэуа жыгым пщIащэ къыпыкIэркъым.
