Iуащхьэмахуэ зэхуешэс

9 октября, 2025 - 06:58
Дыгъэгъазэм и 4 - 7-хэм «Iуащхьэмахуэ» курортым къыщызэIуахынущ мыгъэрей бгы-лыжэ къэжыхьыгъуэр. ЩIымахуэ спорт лIэужьыгъуэхэм дихьэххэмрэ туристхэмрэ мин бжыгъэкIэ абы къэкIуэнущ.
«ЩIымахуэм дыпежьэу, «Iуащхьэмахуэ» курортым Iуэхугъуэшхуэ щызэхэтшэнущ: 2025 - 2026 гъэхэм Урысейм и бгы-лыжэ къэжыхьыгъуэр гуфIэгъуэ зэхыхьэкIэ къызэIутхынущ. Урысей Федерацэм и бгы нэхъ лъагэ дыдэм дыгъэгъазэм и 4 - 7-хэм турист куэд щызэхуэсынущ», - къитащ «Урысейм и къуршхэр» бжыгъэ лъабжьэ зиIэ платформэм и пресс-IуэхущIапIэм. 
Iуащхьэмахуэ зэхуишэсынущ цIыху мин 12-м щIигъу. Абыхэм нэмыщI, бжыгъэ лъабжьэ зиIэ Iэмалхэр къагъэсэбэпу гуфIэгъуэ зэхыхьэр зэрекIуэкIым кIэлъыплъыфынущ дуней псом и дэнэ щIыпIи щыпсэу цIыху мелуани 150-рэ. Апхуэдэуи Iуащхьэмахуэ лъапэ къыщрагъэблэгъэнущ «Урысейм и къуршхэр» лъэпкъ саугъэтым къыщыхэжаныкIа щIыналъэхэм я лIыкIуэхэр. 
УФ-м и туризм IэнатIэм дежкIэ мыхьэнэшхуэ зиIэ Iуэхугъуэщ мыгъэрей бгы-лыжэ къэжыхьыгъуэр Iуащхьэмахуэ лъапэ деж зэрыщыщIидзэм, жиIащ УФ-м экономикэ зыужьыныгъэмкIэ и министрым и къуэдзэ Назаров Сергей. 
«Ди дежкIэ ехьэкIыпIэ зимыIэ Iуэхушхуэу щытщ «Iуащхьэмахуэ» курортым ар зэрыщекIуэкIынур: уэс IэрыщI къыщIэзыгъэкI системэхэр ягъэув, жэщкIэ гъуэгухэр къызэщIагъэнэхунущ, лыжэхэмкIэ къыщажыхь щIыпIэхэм я бжыгъэм къыхыдогъахъуэ. Псом нэхърэ нэхъыщхьэращи, Урысейм и бгы-лыжэ индустрием Iуащхьэмахуэ щыпэрытщ», - къыхигъэщащ Назаровым. 
Кавказ.РФ-м и унафэщI Юмшанов Андрей жиIащ, Iуащхьэмахуэ Урысейм и дамыгъэ лъапIэу зэрыщытыр, дунейм и дэнэ щIыпIи щыпсэу альпинистхэмрэ лыжэкIэ бгым къыщызыжыхьхэмрэ ар фIы дыдэу зэрацIыхур.
«Хуэм-хуэмурэ курортым зыдогъэужь икIи, лыжэкIэ къэзыжыхьхэмрэ альпинистхэмрэ ямызакъуэу, нэгъуэщI спорт унэтIыныгъэхэм дихьэххэри къетшэлIэн мурад диIэщ. Абыхэми, хьэщIэхэми щхьэкIэ тыншыпIэхэр къахузыдогъэпэщ. Мы гъэм бгым и къуэкIыпIэ лъэныкъуэмкIэ лыжэхэм щхьэкIэ гъуэгущIэхэр къыщызэIутхынущ, жэщкIэ ахэр псори къызэщIэдгъэнэхунущ», - къыхигъэщащ Юмшановми. 
Къэбэрдей-Балъкъэрым и Iэтащхьэ КIуэкIуэ Казбек и фIэщ мэхъу, мы гъэм бгы-лыжэ къэжыхьыгъуэр къызэрызэIуахынум иращIылIэну гуфIэгъуэ зэхыхьэр хьэщIэхэм ягу зэрырихьынур икIи республикэм и зыужьыныгъэм ар шэсыпIэ хуэхъуну, щIыналъэм и щэнхабзэр, щIыуэпсыр, экономикэр ипэкIэ зэригъэкIуэтэнур.
Урысейм бгы-лыжэ къэжыхьыгъуэр Iуащхьэмахуэ мы гъэм къыщызэIухыным ехьэлIа къэрал пэхуэщIэр ягъэзащIэ УФ-м Экономикэ зыужьыныгъэмкIэ и министерствэмрэ Кавказ.РФ-мрэ къадэIэпыкъуу.
ХЬЭЩЫКЪУЕЙ Олег.
  • 11 просмотров
Поделиться:

Читать также:

15.11.2025 - 18:39 → Спорт хъыбархэр
15.11.2025 - 17:59 → Спорт хъыбархэр
12.11.2025 - 17:18 → Спорт хъыбархэр
11.11.2025 - 15:00 → Ахъмэт Амир и гъэсэнхэм Кубокыр къахь
10.11.2025 - 17:02 → Спорт зэхьэзэхуэхэр